Iöb 5 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1 Galw yn awr! A oes a ’th ettyb?

Ac at bwy o’r rhai sanctaidd y tröi di?

2(Nage!) ond yr ynfyd a ladd gofid,

A’r annoeth a ddïeneidia digllondeb:

3Myfi a welais yr ynfyd yn gwreiddio,

A melldithiais ei drigfa ef yn ebrwydd;

4Pell yw ei feibion ef oddi wrth iachawdwriaeth,

Briwiwyd hwynt yn y porth ac nid (oedd) achubydd;

5Yr hwn, ei gynhauaf ef y mae ’r newynog yn ei fwytta,

Allan o’r drain y cymmer efe ef;

A’r sychedig a drachwanta am eu cyfoeth;

6 Canys nid dyfod o’r llwch y mae cystudd,

Ac nid o’r ddaear y blagura trallod;

7 Ond dyn i drallod a enir,

Fel y bydd gwreichion yn ehedeg i’r uchelder.

8 Etto myfi a ymgyrchwn at Dduw,

Ac ar yr Arglwydd y rhoddwn fy achos,

9Yr Hwn sy’n gwneuthur pethau mawrion hyd nad (oes eu) chwilio,

Pethau rhyfeddol hyd nad (oes eu) rhifo;

10Yr Hwn sy’n rhoddi gwlaw ar wyneb y ddaear,

Ac yn danfon dyfroedd ar wyneb y porfëydd;

11Gan osod y rhai isel mewn uchelder,

A’r galarus sy’n cael uchel iachawdwriaeth;

12Yr Hwn sy’n chwilfriwio amcanion y rhai call,

Fel na wnelo eu dwylaw hwynt eu bwriad;

13Yr Hwn sy’n dal y doethion yn eu callineb,

A chynghor yr hocedus a wneir yn fyrbwyll;

14Lliw dydd y cyfarfyddant hwy â thywyllwch,

Ac, fel (ped fai) nos, y palfalant ar hanner dydd;

15Felly, Efe a weryd y difrodedig o’u safn hwynt,

Ac o law’r cadarn, yr anghenog,

16Ac y mae gan y tlawd obaith,

Ac anwiredd sy’n cau ei safn:

17Wele, gwỳn ei fyd y dyn a argyhoeddo Duw,

Am hynny, cerydd yr Hollalluog na wrthod di,

18Canys Efe a glwyfa ac a rwyma,

Efe a dery, a’i ddwylaw Ef a iachânt;

19 Mewn chwech o gyfyngderau Efe a’th weryd,

Ac mewn saith ni chaiff drwg gyffwrdd â thi;

20Mewn newyn Efe a’th weryd rhag marwolaeth,

Ac mewn rhyfel rhag llaw’r cleddyf;

21Pan ffrewyllio tafod, ti a guddir,

Ac ni chei ofni rhag y dinystriad, pan ddelo;

22Ar y dinystriad a’r newyn y chwerddi,

A rhag bwystfilod y maes nid ofni,

23 Canys â cherrig y maes (y bydd) cynghrair i ti,

A bwystfilod y maes a fyddant yn heddychol â thi;

24A chei brofi mai heddwch (fydd) dy annedd,

Ac adolygi dy borfa ac ni chenfyddi goll;

25A phrofi mai aml dy hâd,

A’th hiliogaeth megis gwellt y ddaear;

26Ti a ddeui mewn oedran addfed i’r bedd,

Fel yr esgyn ysgafn o ŷd yn ei amser.

27Wele hyn, ni a’i chwiliasom, felly (y mae) hi;

Gwrando hyn; a thydi, derbyn i’th dy hun wybodaeth.