Psalmau 36 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1I’r blaengeiniad. (Psalm) o eiddo gwas Iehofah, (sef) o eiddo Dafydd.

2Oraclaidd leferydd pechod (sydd) i’r annuwiol ynghanol ei galon,

Nid (oes) arswyd Duw o flaen ei lygaid;

3Ond ei wenieithio ef a wna (pechod), o flaen ei lygaid,

Rhag canfod o hono ei anwiredd, rhag (iddo ei) gashâu;

4Geiriau ei enau (sy) ddrygioni a thwyll,

Peidiodd â bod yn gall, a gwneuthur da;

5Drygioni a amcana efe ar ei wely,

Gesyd ei hun ar ffordd nad (yw) dda,

A drwg nid ymwrthod efe.

6O Iehofah, hyd at y nefoedd (y mae) Dy radlondeb,

Dy wirionedd (sydd) hyd y cymmylau;

7Dy gyfiawnder (sy) fel mynyddoedd Duw,

Dy farnedigaethau fel y dyfnder mawr;

Dyn a bwystfil, yr wyt yn eu cymmorth, O Iehofah.

8Mor werthfawr (yw) Dy radlondeb Di, O Dduw!

A meibion dynion, ynghysgod Dy adennydd yr ymnoddant hwy,

9Gorlenwir hwy o frasder Dy dŷ,

Ac âg afon Dy bleserau y dïodi hwynt,

10Canys gyda Thydi (y mae) ffynnon bywyd,

Yn Dy oleuni Di y gwelwn oleuni:

11Gorestyn Dy radlondeb i’r rhai a’th adwaenont,

A Dy gyfiawnder i’r rhai uniawn o galon:

12Na ddeued arnaf droed balchder,

A llaw’r drygionus rai, na wnaed hi fi yn grwydryn!

Yno y syrthiodd gweithwyr drygioni,

Gwthiwyd hwynt i lawr, ac heb allu o honynt gyfodi.