Psalmau 113 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1Molwch Iah!

Molwch, O weision Iehofah,

Molwch enw Iehofah!

2Bydded enw Iehofah yn fendigedig,

O’r pryd hyn, ac yn dragywydd!

3O godiad haul hyd ei fachludiad

Moler enw Iehofah!

4Uchel goruwch yr holl genhedloedd (yw) Iehofah,

Goruwch y nefoedd (yw) Ei ogoniant!

5Pwy fel Iehofah, ein Duw ni,

Yr Hwn sy’n uchel yn orseddawg,

6Yr Hwn sy’n gostwng (Ei lygaid) i edrych

Ar y nefoedd ac ar y ddaear;

7Yr Hwn sy’n codi o’r llwch yr egwan,

Ac o’r dom y dyrchafa’r anghenus,

8I beri iddo eistedd ynghyda thywysogion,

—Ynghyda thywysogion Ei bobl;

9Yr Hwn sy’n peri i’r ammhlantadwy yn ei thŷ drigo

Yn fam plant lawen?

Molwch Iah!