Eshaiah 25 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1 Iehofah, fy Nuw (ydwyt) Ti,

Dyrhafaf Di, moliannaf Dy enw,

Canys gwnaethost ryfeddodau,

Cynghorion er ys talm, ffyddlondeb ffyddlawn.

2Canys gosodaist y ddinas yn bentwr,

Y dref gaerog yn garnedd,

Uchelfa ’r beilchion fel na bo’n ddinas,

Byth nid adeiledir hi.

3Am hynny y ’th ogonedda pobl nerthol,

Dinas y cenhedloedd ofnadwy a ’th arswyda.

4Canys buost nerth i’r tlawd,

Nerth i’r anghenog yn ei gyfyngder,

Yn nodded rhag tymmestl, yn gysgod rhag gwres,

Pan oedd yspryd y rhai ofnadwy fel tymmestl (yn erbyn) mur.

5Fel gwres mewn sychdir, twrf y beilchion a iseli;

Fel gwres yng nghysgod cwmmwl, cân orfoleddus y rhai ofnadwy a ddarostyngir,

6Ac fe wna Iehofah y lluoedd

I’r holl bobloedd yn y mynydd hwn

Wledd o ddanteithion, gwledd o hên win,

Danteithion meraidd, hên win puredig.

7Ac Efe a ddifa yn y mynydd hwn

Y gorchudd sydd yn gorchuddio ’r holl bobloedd,

A’r llen a’r oedd yn llenu ’r holl genhedloedd.

8Efe a ddifa angau am byth,

A sych yr Arglwydd Iehofah y deigr oddi ar bob wyneb,

A gwarthrudd Ei bobl a dỳn Efe ymaith oddi ar yr holl ddaear;

Canys Iehofah a’ i llefarodd.

9A dywedant yn y dydd hwnnw,

Wele ein Duw ni, Hwn!

Gobeithiasom ynddo, ac Efe a fu yn Iachawdwr i ni;

Hwn! Iehofah! Gobeithiasom ynddo;

Gorfoleddwn, a llawenychwn yn Ei iachawdwriaeth Ef.

10Canys fe orphwys llaw Iehofah yn y mynydd hwn;

A dyrnir Moab dano

Fel y dyrnir gwellt dan olwyn menn.

11 Ac efe a estyn ei ddwylaw ynghanol hyn

Fel yr estyn un sy’n suddo (ei ddwylaw) i nofio,

Ond Efe a ostwng ei falchder â chrafangiad disymmwth Ei law.

12Ac ymddiffynfa dy uchel gaerau Efe a ogwydda,

Efe a ostwng, Efe a ddwg i lawr hŷd y llwch.