Eshaiah 34 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1Nesêwch, genhedloedd, i glywed;

A phobloedd, gwrandêwch;

Gwrandawed y ddaear a’i chyflawnder,

Y byd a’i holl gnwd.

2Canys llidiowgrwyd (sydd) i Iehofah yn erbyn yr holl genhedloedd,

Ac angerdd llid yn erbyn eu holl luoedd hwynt;

Diofrydodd hwynt, rhoddes hwynt i’r lladdfa,

3A’u lladdedigion a fwrir allan,

Ac o’u celannedd yr esgyn eu drewiant,

A thoddir y mynyddoedd o’u gwaed hwynt.

4Ac fe nycha holl lu ’r nefoedd,

Ac fel 2llyfr y 1plygir y nefoedd,

A’i holl lu a syrth

Fel y syrthiai deilen o’r winwŷdden,

Ac fel (ffigysen) yn syrthio oddi ar y ffigys-bren.

5Canys meddwodd Fy 2nghleddyf 『1yn y nefoedd;』

Wele, ar Edom y disgyn efe,

Ac ar bobl Fy niofryd, i farn.

6Cleddyf Iehofah a lanwyd o waed,

Tewychodd gan frasder,

Gan waed ŵyn a bychod geifr,

Gan frasder arennau hyrddod;

Canys aberthiad (sydd) gan Iehofah yn Botsrah,

A lladdfa fawr yn nhir Edom.

7Ac fe ddisgyn y buail gyda hwynt,

A’r bustych gyda ’r teirw,

Ac e feddwa eu tir hwynt o’u gwaed,

A’u llwch gan frasder a dewycha.

8Canys diwrnod dïal (yw) i Iehofah,

Blwyddyn taledigaeth i Ddadleuwr Tsïon.

9 A thröir ei hafonydd yn bŷg,

A’i llwch yn frwmstan,

A bydd y ddaear yn bŷg llosgedig;

10Dydd a nos nis diffoddir hi,

Am byth yr esgyn ei mŵg hi,

Yn oes oesoedd y diffaethir hi;

Am byth bythoedd ni (bydd) cynniweirydd trwyddi:

11Ond e feddianna ’r pelican a’r draenog hi,

A’r dylluan a’r gigfran a drigant ynddi,

Ac Efe a estyn arni linyn anghyfanneddiad,

A phlymen gwagder dros ei chras-dir.

12Ni bydd yno frenhiniaeth i’w henwi ganddynt,

Ai holl dywysogion hi fyddant ddiddym.

13Ac fe gyfyd yn ei phalasau ddrain,

Danadl a mieri yn ei hamgeurydd,

A hi a fydd yn drigfa dreigiau,

Yn gyntedd i gywion yr estrys.

14A chyferfydd bwystfilod yr anialwch â’r gweilch,

A’r ellyll ar ei gymhar a eilw;

Ac yno yr ymdawela aderyn y corph,

Ac y caiff iddo ei hun orphwysfa.

15Yno y nytha ’r dylluan, ac y dodwa,

Ac y deora, ac y casgl (ei chywion) yn ei chysgod;

Ac yno y cesglir y fylturiaid,

Pob un gyda ’i gymhar.

16Ceisiwch allan o lyfr Iehofah, a darllenwch;

Un o’r rhai hyn ni fydd ddiffygiol,

Pob banyw am ei chymhar ni fydd mewn eisiau,

Canys genau Iehofah a orchymmynodd,

A’i yspryd Ef ei hun a’u casglodd hwynt.

17Ac Efe a fwriodd iddynt y coelbren,

A’i law Ef a’i rhannodd iddynt wrth linyn;

Yn dragywydd y meddiannant hwy hi,

Yn oes oesoedd y preswyliant ynddi.