1Emyn o eiddo Dafydd.
Dyrchafaf Di fy Nuw, O Frenhin,
A bendithiaf Dy enw yn dragywydd a byth;
2Beunydd y’th fendithiaf,
A chlodforaf Dy enw yn dragywydd a byth!
3Mawr (yw) Iehofah a chlodforedig iawn,
A’i fawredd (sydd) anchwiliadwy!
4Cenhedlaeth wrth genhedlaeth a fawl Dy weithredoedd,
A’th gadernid a fynegant hwy!
5Ardderchowgrwydd gogoniant Dy fawrhydi,
A’th bethau rhyfedd, a ganaf;
6A nerth Dy weithredoedd ofnadwy a draethant hwy,
A’th fawr weithredoedd,—adroddwyf fi hwynt!
7Mawl amlder Dy ddaioni a lefarant,
A’th gyfiawnder a lawen-ganant!
8Graslawn a thrugarog (yw) Iehofah,
Hwyrfrydig i ddig, a mawr (Ei) drugaredd;
9Daionus (yw) Iehofah i bawb,
A’i drugareddau (sydd) ar Ei holl weithredoedd;
10Talu dïolch i Ti, O Iehofah, a wna Dy holl weithredoedd,
A’th saint a’th fendithiant;
11Gogoniant Dy frenhiniaeth a draethant hwy,
Ac am Dy gadernid y dywedant;
12I hyspysu i feibion dynion Ei gadernid Ef,
A gogoniant ardderchowgrwydd Ei frenhiniaeth!
13Dy frenhiniaeth (sydd) frenhiniaeth dragywyddol!
A’th lywodraeth ymhob cenhedlaeth a cenhedlaeth!
14Cynnaliwr (yw) Iehofah i’r holl rai a syrthiont,
Ac yn sythu y crymmedig rai!
15Llygaid pob peth a ddisgwyliant Wrthyt,
A Thydi (sy)’n rhoddi iddynt eu bwyd yn ei bryd,
16Gan agoryd Dy law,
A chan orddigoni i bob peth byw ei chwennychiad:
17Cyfiawn (yw) Iehofah yn Ei holl ffyrdd,
A charedig yn Ei holl weithredoedd;
18Agos (yw) Iehofah i’r holl rai a alwont Arno,
—I’r holl rai a alwont Arno mewn gwirionedd:
19Chwennychiad y rhai a’i hofnont Ef a wna Efe,
A’u llefain a glyw Efe, ac a’u gweryd:
20Cadw (y mae) Iehofah yr holl rai a’i carant Ef,
Ond yr holl annuwiolion a ddifetha Efe!
21Moliant Iehofah a draetha fy ngenau;
A bendithied pob cnawd Ei enw sanctaidd Ef,
Yn dragywydd a byth!
Who We AreWhat We EelieveWhat We Do
2025 by iamachristian.org,Inc All rights reserved.
