Iöb 8 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

VIII.

1Yna yr attebodd Bildad y Shwhiad a dywedodd,

2Pa hŷd yr adroddi di y fath bethau,

Ac yn wỳnt cryf (y bydd) geiriau dy enau?

3Ai Duw a ŵyra uniondeb,

Ac ai ’r Hollalluog a ŵyra gyfiawnder?

4Os dy feibion a bechasant yn Ei erbyn Ef,

Efe a’u rhoddes yn llaw eu camwedd.

5Os tydi a geisi Dduw,

Ac a weddïi ar yr Hollalluog;

6Os pur ac uniawn tydi,

Yn ddïau, gan hynny, Efe a wylia drosot,

Ac a heddycha drigfa dy gyfiawnder,

7A bydd dy gyflwr gynt (megis) bychan,

A’th gyflwr i ddyfod a fawrhêir yn ddirfawr,

8 — Canys gofyn, attolwg, i’r genhedlaeth gynt,

Ac ystyria ymchwiliad eu tadau hwythau;

9O herwydd er doe nyni, ac ni wyddom ni ddim,

Canys cysgod (yw) ein dyddiau ni ar y ddaear;

10Onid hwy a wnant dy ddysgu, a dywedyd wrthyt,

Ac o’u calon ddwyn allan ymadroddion? (sef)

11 “A uchel-dŷf y frwynen mewn (lle) nad yw gors?

A fawrhêir hesgen y Nilws heb ddyfroedd?

12 A hi etto yn ei gwyrddedd, ni thorrir hi ymaith,

Ond o flaen pob glaswelltyn gwywo a wnaiff hi;

13Felly ffyrdd yr holl rai sy’n anghofio Duw,

Ac y diflanna gobaith yr annuwiol,

14Yr hwn y torrir ymaith ei obaith,

A thŷ pryf coppyn (yw) ei hyder;

15Ymbwyso a wna efe ar ei dŷ, ond hwn ni saif,

Ymaflyd a wna efe ynddo, ond hwn ni phery:

16 Irawl yw efe o flaen yr haul,

A thros ei ardd ei ysgewyll a ânt allant;

17Ar bentwr (meini) ei wraidd ef a ymblethant,

Trigfa’r cerrig a genfydd efe:

18 (Ond) pan ddiwreiddio (dyn) ef allan o’i le,

Hwn a’i gwâd ef (gan ddywedyd) ‘Ni welais i mo honot.’

19 Wele! hyn yma (yw) llawenydd ei ffordd ef!

Ac o’r pridd (yna) ereill a flagurant!”

20Wele, Duw ni ddirmyga ’r perffaith,

Ac nid ymeifl Efe yn llaw y rhai drygionus! —

21 Hyd oni lanwo Efe dy enau di â chwerthin,

A’th wefusau â bloedd gorfoledd,

22A bod i’th gaseion ymwisgo â chywilydd,

Ac i babell yr annuwiolion ddiflannu.