Eshaiah 2 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1 y gair yr hwn a welodd eshaiah mab amots am iwdah a ierwshalem.

2Bydd yn y 2dyddiau 1 diweddaf:

Sefydledig fydd mynydd tŷ Iehofah ym mhen y mynyddoedd

A dyrchafedig goruwch y bryniau,

A dylifa atto y cenhedloedd oll:

3Ac aiff pobloedd lawer, a dywedant,

Deuwch ac esgynwn i fynydd Iehofah,

I dŷ Duw Iacob,

Ac Efe a’n dysg ni yn Ei ffyrdd,

A ni a rodiwn yn Ei lwybrau Ef,

Canys o Tsïon yr aiff y gyfraith allan,

A gair Iehofah o Ierwshalem.

4Ac Efe a farna rhwng y cenhedloedd,

Ac a argyhoedda bobloedd lawer,

A hwy a gurant eu cleddyfau yn sychau,

A’u gwaywffyn yn grymmanau;

Ni chyfyd cenedl yn erbyn cenedl gleddyf,

Ac ni ddysgant mwyach ryfel.

5Tŷ Iacob, deuwch, a rhodiwn yng ngoleuni Iehofah.

6Yn ddïau, ymadewaist â’th bobl, tŷ Iacob,

Am eu bod wedi eu llenwi o’r dwyrain,

A’u (bod) yn swynwŷr megis y Philistiaid,

A chyda meibion dïeithriaid y tarawsant law.

7A llanwyd ei dir o arian ac aur,

Ac nid (oes) diben ar ei drysorau:

A llanwyd ei dir o feirch,

Ac nid (oes) diben ar ei gerbydau;

8A llanwyd ei dir o eulunod,

I waith ei ddwylaw yr ymostyngant,

I’r hyn a wnaeth ei fysedd.

9Gan hynny gostyngir y gwreng ac iselir y bonheddig,

Ac ni faddeui iddynt.

10Dos i’r graig ac ymgûdd yn y llwch,

Rhag wyneb dychryniad Iehofah, a rhag gogoniant Ei fawredd Ef.

11Trem uchel dyn a iselir,

A gostyngir uchder dynionach,

A dyrchefir Iehofah yn unig yn y dydd hwnnw.

12Canys (y mae) dydd i Iehofah y lluoedd yn erbyn pob balch ac uchel,

Ac yn erbyn pob dyrchafedig, ac efe a iselir:

13Ac yn erbyn holl gedrwŷdd Lebanon, yr uchelion a’r dyrchafedigion,

Ac yn erbyn holl dderw Bashan;

14Ac yn erbyn yr holl fynyddoedd, yr uchelion;

Ac yn erbyn yr holl fryniau, y dyrchafedigion,

15Ac yn erbyn pob tŵr uchel,

Ac yn erbyn pob magwyr gadarn,

16Ac yn erbyn holl longau Tarshish,

Ac yn erbyn pob manylwaith dymunol;

17A gostyngir mawredd dyn,

Ac iselir uchder dynionach,

A dyrchefir Iehofah yn unig yn y dydd hwnnw.

18A’r eulunod yn hollol a ddiflannant,

19A hwy a ânt i ogofau ’r creigiau, ac i dyllau ’r llwch,

Rhag wyneb dychryniad Iehofah, a rhag gogoniant Ei fawredd Ef,

Pan gyfodo Efe i frawychu ’r ddaear.

20Yn y dydd hwnnw y teifl dyn ei eulunod arian

A’i eulunod aur, y rhai a wnaethant i’w haddoli,

I’r wâdd ac i’r ystlummod,

21I fyned i agennau ’r creigiau ac i holltau ’r clogwyni,

Rhag wyneb dychryniad Iehofah, a rhag gogoniant Ei fawredd Ef,

Pan gyfodo Efe i frawychu’r ddaear.

22Peidiwch â dyn yr hwn (sydd) âg anadl yn ei ffroenau;

Canys ym mha beth y gwneir cyfrif o hono ef?