Eshaiah 35 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1Fe lawenycha ’r anialwch a’r anghyfanneddle;

Ac fe orfoledda ’r diffaethwch, a blodeua fel lili;

2Gan flodeuo y blodeua efe,

Ac y gorfoledda yn ddïau â gorfoledd ac â chân:

Gogoniant Lebanon a roddir iddo,

Godidowgrwydd Carmel a Sharon:

Y rhai hyn a welant ogoniant Iehofah,

Godidowgrwydd ein Duw ni.

3Cadarnhêwch y dwylaw llesg,

A’r gliniau gwegiawl, cryfhêwch hwynt;

4Dywedwch wrth y rhai aflonydd o galon, Ymgryfhêwch,

Nac ofnwch; wele eich Duw chwi!

Dïal a ddaw, attaliad Duw;

Efe a ddaw ac a fydd Iachawdwr i chwi.

5Yna yr agorir llygaid y deillion,

A chlustiau ’r byddarion a agorir.

6Yna y llamma ’r 2cloff 『1fel hŷdd』

Ac y llawen-gân tafod y mudan.

Canys 『2yn yr anialwch』 y 1tyr dyfroedd allan,

Ac afonydd yn y diffaethwch.

7Ac yr aiff yr hûd-ddwfr yn llynn,

A’r tir sychedig yn fwrlymiaid dyfroedd.

Yn nhrigfa ’r dreigiau y tŷf

Y glaswellt gyd a’r gorsen a’r frwynen.

8A bydd yno brif-ffordd,

Ac “Y ffordd sanctaidd,” y gelwir hi;

Nid aiff ar hyd-ddi un halogedig;

Ond Efe fydd gyda hwynt gan rodio ’r ffordd,

A’r ynfydion ni chyfeiliornant ynddi.

9Ni bydd yno lew,

A gormeswr y bwystfilod ni ddring iddi,

Ac nis ceir efe yno,

Eithr yno y rhodia ’r prynedigion.

10Ië, gwaredigion Iehofah a ddychwelant,

Ac a ddeuant i Tsïon â hyfryd gân;

A llawenydd tragywyddol ar eu pennau;

Hyfrydwch a llawenydd a oddiweddant hwy,

Ac ymaith y ffŷ cystudd a galar.