Psalmau 66 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1I’r blaengeiniad. Cân. Psalm.

Llawen-floeddiwch i Dduw, yr holl ddaear,

2Cenwch ogoniant Ei enw,

Gwnewch Ei foliant yn ogoneddus,

3Dywedwch wrth Dduw, “Mor ofnadwy Dy weithredoedd,

O herwydd mawredd Dy nerth gwenieithia Dy elynion Wrthyt,

4Yr holl ddaear a warogaethant i Ti,

A tharawant y tannau i’th enw:”

5Deuwch a gwelwch weithredoedd Duw,

Ofnadwy yr hyn a orug Efe i feibion dynion,

6Trôdd fôr yn sychdir,

Trwy’r afon yr aeth (dynion) ar draed,

—Yna y llawenychasom ynddo Ef; —

7Llywodraetha trwy Ei gadernid yn dragywydd,

Ei lygaid, ar y cenhedloedd yr edrychant allan,

Y gwrthgilwyr a beidiant âg ymddyrchafu. Selah.

8Bendithiwch, O bobloedd, ein Duw ni,

A pherwch glywed llefain Ei fawl,

9Yr Hwn a osododd ein henaid mewn bywyd,

Ac ni adawodd i’n traed siglo,

10Canys profaist ni, O Dduw,

Coethaist ni fel coethi arian;

11Dygaist ni i’r rhwyd,

Gosodaist lwyth trwm ar ein llwynau;

12Marchogaeth o ddynion ar ein pennau a beraist,

Daethom i mewn i’r tân ac i’r dyfroedd;

Ond dygaist ni allan i orlawnder.

13Deuaf i’th dŷ âg offrymmau,

Talaf i Ti fy addunedau,

14Y rhai a adroddodd fy ngwefusau,

Ac a ddywedodd fy ngenau yn fy nghyfyngder;

15Offrymmau breision a offrymmaf i Ti,

Ynghyda llosgiad hyrddod,

Aberthaf ychen ynghyda bychod. Selah.

16Deuwch, gwrandewch, a mynegaf, O’r rhai oll sy’n ofni Duw,

Yr hyn a wnaeth Efe i’m henaid,—

17Arno Ef â’m genau y gelwais,

A chlodforedd (oedd) ar fy nhafod;

18Ped ar ddrygioni y syllaswn yn fy nghalon,

Ni wrandawsai Duw;

19Ond gwrandawodd Duw,

Daliodd sulw ar lais fy ngweddi.

20Bendigedig (fyddo) Duw,

Yr Hwn ni roddodd ymaith fy ngweddi

Na’i drugaredd Ef oddi wrthyf finnau!