Psalmau 78 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1Awdl addysgiadol. I Asaph.

Gwrando, O fy mhobl, ar fy addysg,

Gogwyddwch eich clust at eiriau fy ngenau:

2Agoraf mewn dïareb fy ngenau,

Bwrlymaf ddamhegion o’r cynfyd,

3Y rhai a glywsom ac a wybuom,

A’n tadau a’(u) mynegasant i ni;

4Ni chelwn rhag eu meibion,

Gan fynegi i genhedlaeth ddiweddarach foliant Iehofah.

A’i nerth Ef, a’i ryfeddodau y rhai a wnaeth Efe,

5Canys sefydlodd Efe hwynt i’w meibion,

6Fel y gwybyddai cenhedlaeth ddiweddarach

—(Sef) plant a enid,

A gyfodent, ac a fynegent i’w meibion hwythau,—

7Ac y gosodent ar Dduw eu hyder,

Ac nad anghofient weithredoedd Duw,

Ac ar Ei orchymynion Ef y dalient,

8Ac na byddent fel eu tadau,

Cenhedlaeth wrthnysig a gwrthryfelgar,

Cenhedlaeth na wadalodd ei chalon,

Ac nid ffyddlon tuag at Dduw oedd ei hyspryd.

9Meibion Ephraim (oeddynt) arfog, ac yn saethu, â’r bwa,

Troisant (eu cefnau) yn nydd y frwydr;

10Ni chredasant gyfammod Duw,

Ac yn Ei addysg Ef y gwrthodasant rodio;

11Anghofiasant Ei weithredoedd Ef,

A’i ryfeddodau, y rhai a ddangosasai Efe iddynt:

12Yngwydd eu tadau y gwnaeth Efe ryfeddod,

Yn nhir yr Aipht, (ym) maes Tsöan,

13Holltodd y môr a throsgludodd hwynt,

A pharodd sefyll y dyfroedd fel clawdd;

14Tywysodd hwynt â chwmmwl liw dydd,

A’r holl nos â goleuni tân;

15Holltodd y creigiau yn yr anialwch,

A dïododd (hwynt) megis â mawr ddyfroedd, yn ehelaeth;

16Dug allan ffrydiau o’r clegyr,

A pharodd ddisgyn, fel afonydd, ddyfroedd;

17Ond chwannegasant hwy etto bechu yn Ei erbyn Ef,

(A) gwrthryfela yn erbyn y Goruchaf yn y diffaethwch;

18A themtiasant Dduw yn eu calon,

Gan ofyn bwyd iddynt eu hunain,

19A llefarasant yn erbyn Duw,

Dywedasant, “A ddichon Duw

Arlwyo bwrdd yn yr anialwch?

20Wele, tarawodd Efe y graig, a ffrydiodd dyfroedd,

Ac afonydd a orlifasant;

Ai bara hefyd a ddichon Efe ei roddi?

A ddarpara Efe gig i’w bobl?”

21Am hynny y clybu Iehofah, ac y digiodd,

A thân a ennynodd yn erbyn Iacob.

A llid a gyfododd yn erbyn Israel,

22Am na chredasant yn Nuw,

Ac nad ymhyderasant yn Ei iachawdwriaeth Ef:

23A gorchymynodd Efe i’r wybrennau oddi uchod.

A drysau’r nefoedd a agorodd Efe,

24A gwlawiodd arnynt fanna i’w fwytta,

Ac ŷd y nefoedd a roddodd Efe iddynt,

25Bara angylion a fwyttâodd pob un,

Ymborth a ddanfonodd Efe iddynt hyd orddigonedd:

26Gyrrodd y dwyrein-wŷnt yn y nefoedd.

A dug. yn Ei nerth, y deheu-wỳnt,

27A gwlawiodd arnynt gig fel llwch,

Ac fel tywod y môr, adar asgellog;

28A gwnaeth (iddynt) syrthio o fewn eu gwersyll,

O amgylch eu preswylfeydd;

29A bwyttasant, a gorddigonwyd hwy yn ddirfawr.

A’r hyn a flysiasant a ddug Efe iddynt;

30Nid ymadawsent â’r hyn a flysiasant,

Eu bwyd (oedd) etto yn eu safnau.

31A llid Duw a gyfododd yn eu herbyn,

A lladdodd Efe ymhlith eu pasgedig rai,

A gwŷr ieuaingc Israel a orchreiniodd Efe;

32Gyda hyn oll pechasant etto,

Ac ni chredasant i’w ryfeddodau Ef,

33A diflannu mewn tarth y gwnaeth Efe i’w dyddiau,

Ac i’w blynyddoedd mewn dinystr disyfyd:

34Pan laddai Efe hwynt y ceisient Ef,

Y dychwelent ac y chwilient am Dduw,

35Ac y cofient mai Duw (oedd) eu Craig,

Mai Duw, y Goruchaf, (oedd) eu Rhyddhâwr,

36Ond twyllent Ef â’u genau,

Ac â’u tafod y celwyddent Wrtho,

37A’u calon ni fyddai fferf tuag Atto,

Ac ni sicr-safent yn Ei gyfammod Ef,

38Ond Efe,—yn drugarog y maddeu Efe anwiredd, ac ni ddiddyma,

Mynych-ddychwel Efe Ei lid,

Ac ni chyffry Ei holl angerdd,—

39A chofiodd mai cnawd (oeddynt) hwythau,

Gwynt a’r sy’n myned ac na ddychwel:

40Pa sawl gwaith y gwrthryfelasant i’w erbyn yn yr anialwch,

Y gofidiasant Ef yn y diffaethwch,

41Y dychwelasant i brofi Duw,

A Sanct yr Israel a boenasant,

42Heb gofio o honynt Ei law Ef,

A’r dydd pan ryddhaodd Efe hwynt oddi wrth y gorthrymydd,

43Pan y gwnaeth Efe, yn yr Aipht, Ei arwyddion,

A’i ryfeddodau ym maes Tsöan—

44Y trôdd Efe eu hafonydd yn waed,

A’u ffrydiau nad yfent hwy—

45Y danfonodd Efe i’w plith y gwibedyn a’u bwyttâodd,

(A)’r llyffaint a’u difethodd—

46Ac y rhoddes Efe, i lindys yr ŷd, eu cnwd hwynt,

A’u llafur i’r locust—

47Y distrywiodd Efe, â chenllysg, eu gwin-wydd,

Ac eu sycomor-wydd â rhew—

48Ac y traddododd Efe, i’r cenllysg eu gwartheg,

A’u diadellau i’r mellt—

49—Danfon arnynt y mae Efe angerdd Ei lid,

Digter, ac irllonedd, a chyfyngder,

Catrawd o angylion anffawd;

50Llyfnu llwybr y mae Efe i’w lid,

Nid attaliodd, rhag angau, eu henaid hwynt,

A’u bywyd i’r haint a draddodes Efe—

51Y tarawodd Efe bob cyntafanedig yn yr Aipht,

Blaenffrwyth nerth ymhebyll Ham;

52A myned ymaith, fel defaid, a wnaeth Efe i’w bobl,

Ac y’u harweiniodd fel praidd yn yr anialwch,

53Ac y’u tywysodd mewn hyder, heb ofni o honynt,

Ond eu gelynion a orchuddiodd y môr;

54Ac y’u dug i’w oror sanctaidd,

(I)’r mynydd hwn a ynnillodd Ei ddeheulaw—

55Ac y gyrrodd Efe allan o’u blaen genhedloedd,

Ac y rhannodd hwynt yn feddiant etifeddiaeth,

Ac y cyflëodd yn eu pebyll hwynt lwythau Israel?

56 Ond profasant, a gwrthryfelasant yn erbyn Duw, y Goruchaf,

A’i gynreithiau ni chadwasant,

57 bwa llac;

58A digiasant Ef â’u huchelfannau,

Ac a’u delwau cerfiedig y parasant eiddigedd Iddo;

59Clybu Duw ac ymddigiodd,

A ffieiddiodd, yn ddirfawr, Israel;

60A gadawodd breswylfa Shilo,

—Y babell a breswyliasai Efe ym mysg dynion,

61A rhoddodd i gaethiwed Ei ardderchowgrwydd,

A’i brydferthwch yn llaw y gorthrymwr;

62A thraddodes i’r cleddyf Ei bobl,

Ac wrth Ei etifeddiaeth yr ymddigiodd;

63Ei wŷr ieuaingc Ef a fwyttaodd tân,

A’i wyryfon nid udasant,

64Ei offeiriaid gan y cleddyf a gwympasant,

A’i wragedd gweddwon ni wylasant;

65Etto, deffro, fel cysgwr, a wnaeth yr Arglwydd,

Fel gwron a orchfygasid gan win,

66A tharawodd Ei orthrymwyr yn ol,

Gwarth tragywyddol a roddes Efe iddynt;

67A ffieiddiodd babell Ioseph,

A llwyth Ephraim nid etholodd Efe,

68Eithr etholodd lwyth Iwdah,

Mynydd Tsïon, yr hwn a hoffodd Efe,

69Ac adeiladodd, fel yr uchelderau, Ei gyssegr,

Fel y ddaear yr hon a seiliodd Efe yn dragywydd:

70Ac etholodd Ddafydd Ei was,

A chymmerodd ef o gorlannau ’r praidd,

71Oddi ar ol y rhoddwyr sugn y dug Efe ef,

I fod yn fugail ymhlith Iacob, Ei bobl,

Ac ymhlith Israel, Ei etifeddiaeth;

72A bugeiliodd efe hwynt yn ol symlrwydd ei galon,

Ac â dysbwyll ei ddwylaw yr arweiniodd hwynt.