Psalmau 77 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1I’r blaengeiniad. I Iedwthwn. I Asaph. Psalm

2Fy llais (fydd) ar Dduw, a gwaeddaf,

Fy llais (fydd) ar Dduw, a gwrendy Efe arnaf.

3Yn nydd fy nghyfyngder, yr Arglwydd a geisiais,

Fy nwylaw liw nos a ledid, ac heb beidio,

Gwrthod ei ddiddanu a wnaeth fy enaid.

4—“Cofiaf am Dduw,” — a chythryblir fi,

“Myfyriaf,” — a phalla fy yspryd. Selah.

5Cymmeraist afael ar amrantau fy llygaid,

Cyffröid fi ac ni leferais,

6Meddyliais am y dyddiau gynt,

Blynyddoedd yr hen oesoedd, (gan ddywedyd)

7“Cofiaf fy nghanu’r tannau yn y nos,

A’m calon y myfyriaf;”

Ac ymofynodd fy yspryd,

8“Ai yn dragywydd y bwrw yr Arglwydd ymaith,

Ac oni chwannega Efe i ymfoddhâu mwy?

9Ai darfod am byth a wnaeth Ei drugaredd?

A beidiodd Ei addewid Ef yn oes oesoedd?

10Ai anghofio bod yn radlawn a wnaeth Duw?

A gauodd Efe, mewn llid, Ei dosturiaethau?” Selah.

11Yna y dywedais, “Fy nghlwyfiant,—efe

(Sydd fel) blynyddoedd deheulaw’r Goruchaf;

12Cofiaf weithredoedd Iah,

Ië, cofiaf Dy wyrthiau gynt,

13A myfyriaf ar Dy holl waith,

Ac am Dy weithredoedd yr ystyriaf.”

14O Dduw, mewn sancteiddrwydd (y mae) Dy ffordd;

—Pwy (sy) dduw mawr fel Duw?

15Tydi (yw)’r Duw sy’n gwneuthur rhyfeddodau,

Peraist wybod, ymysg y bobloedd, Dy nerth,

16Rhyddhêaist â’(th) fraich Dy bobl,

Meibion Iacob ac Ioseph,—Selah:

17Dy weled a fu i’r dyfroedd, O Dduw,

Dy weled a fu i’r dyfroedd,—gofidiasant,

—Ië, cynhyrfwyd y dyfnderau;

18Tywallt dyfroedd a wnaeth y cymmylau,

Llais a roddodd yr wybrenau,

—Ië, Dy saethau a ymrodiasant;

19Llais Dy daran (oedd) o amgylch,

Goleuodd y mellt y byd,

Cynhyrfwyd a chrynodd y ddaear;

20Yn y môr (yr oedd) Dy ffordd,

A’th lwybr yn y dyfroedd mawrion,

A’th olion nid adwaenid;

21Tywysaist, fel defaid, Dy bobl,

Trwy law Mosheh ac Aharon.