Psalmau 101 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1Eiddo Dafydd. Psalm.

Am drugaredd ac uniondeb y canaf,

I Tydi, O Iehofah, y tarawaf y tannau:

2Byddaf bwyllog mewn ffordd ddiniweid,

—Pa bryd y deui attaf?—

Ymrodiaf yn niniweidrwydd fy nghalon yn fy nhŷ:

3Ni osodaf o flaen fy llygaid beth anwir,

Gwaith yr encilwyr sydd gas gennyf,

Ni lŷn wrthyf fi;

4Calon ŵyr-dröus gaiff gilio oddi wrthyf,

Drygioni nid adnabyddaf:

5A enllibio yn ddirgel ei gymmydog, hwnnw a ddifaf,

Y dyrchafedig o lygaid a chwyddedig o galon, hwnnw ni ddioddefaf:

6Fy llygaid (ŷnt) ar ffyddloniaid y tir fel y trigont gyda mi,

A rodio mewn ffordd ddiniweid,—hwnnw a’m gwasanaetha;

7Ni chaiff drigo yn fy nhŷ wneuthurwr twyll,

Llefarwr celwydd ni chaiff sefyll o flaen fy llygaid;

8Pob bore y difaf holl annuwiolion y tir,

I dorri ymaith o ddinas Iehofah holl weithredwyr anwiredd.