Psalmau 111 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1Molwch Iah!

Clodforaf Iehofah â (’m) holl galon

Ynghymmanfa ’r uniawn rai a’(u) cynnulleidfa!

2Mawr (yw) gweithredoedd Iehofah,

Ceisiedig gan yr holl rai a ymhyfrydont ynddynt;

3Ardderchowgrwydd a harddwch (yw) Ei waith Ef,

A’i gyfiawnder a saif hyd byth;

4 Coffadwriaeth a wnaeth Efe i’w ryfeddodau,

Graslawn a thosturiol (yw) Iehofah;

5 Ymborth a roes Efe i’r rhai a’i hofnasant,

—Cofia Efe yn dragywydd Ei gyfammod; —

6Cadernid Ei weithredoedd a hyspysodd Efe i’w bobl,

Gan roddi iddynt etifeddiaeth y cenhedloedd;

7Gweithredoedd Ei ddwylaw (ŷnt) ffyddlondeb ac unionder,

Diball (yw) Ei holl orchymynion,

8Yn sefydledig am byth (ac) yn dragywydd,

Yn wneuthuredig mewn ffyddlondeb a chyfiawnder;

9Rhyddhâd a anfonodd Efe i’w bobl,

Pennododd Ei gyfammod yn dragywydd;

Sanctaidd ac ofnadwy (yw) Ei enw!

10Dechreuad doethineb (yw) ofn Iehofah,

Deall da (sydd) gan yr holl rai a’u gwnelont;

Ei fawl Ef a saif hyd byth!