Sirak 50 - Twer? Kronkron（ASWDC）

Onia ba Simon

1Ne nuanom mu ɔkannifoɔ ne ne man mu ahohoahoadeɛ

yɛ ɔsɔfo panin, Onia ba Simon,

a ne nkwa berɛ mu ɔsiesiee efie no,

na ne berɛ so ɔbɔɔ asɔrefie no ho ban no.

2Ɔtoo afasuo atenten mmienu no ho fapem,

sumpii atenten a wɔde wowa afasuo a ɛtwa asɔrefie no ho hyia no.

3Ne berɛ so na wɔtuu abura,

nsu korabea a ɛte sɛ ɛpo hankra.

4Ɔdwenee sɛdeɛ ɔbɛsi agye ne nkurɔfoɔ afiri ɔsɛeɛ mu,

na wabɔ kuro no ho ban afiri ntua ho.

5Sɛdeɛ na n’animuonyam teɛ, na ɛdɔm atwa ne ho ahyia,

ɛberɛ a ɔfirii twamtam dan mu baeɛ no.

6Te sɛ anɔpa nsoromma a ɛwɔ mununkum mu,

sɛ ɔsrane afiri adie awieeɛ wɔ afahyɛ berɛ mu;

7sɛ owia a ɛrehyerɛn wɔ Ɔsorosoroni no asɔrefie atifi,

sɛ nyankontɔn a ɛrehran mununkum mu animuonyam mu;

8sɛ rose nhwiren wɔ aduabakan nna mu,

sɛ nsukooko a ɛsisi nsuo aniwa ho,

sɛ dua a ɛrefefɛ wɔ Lebanon wɔ ɔhyeɛ berɛ mu;

9sɛ ogya ne aduhwam wɔ kukuo mu,

sɛ kyɛnsee a wɔde sika ayɛ

na wɔde aboɔden aboɔ asisi mu;

10sɛ ngo dua a aso aba,

ɛnna ɛte sɛ papea a ayɛ tentene wɔ mununkum mu.

11Ɛberɛ a ɔhyɛ n’animuonyam atadeɛ no,

na ɔsiesiee ne ho wɔ ahoɔfɛ mapa mu,

ɛberɛ a ɔkɔɔ afɔrebukyia kronkron no ho no,

ɔmaa kronkronbea adihɔ hɔ baa nyam.

12Na ɛberɛ a ne nsa aka kyɛfa no afiri asɔfoɔ no nsa mu no,

na ɔgyina afɔrebukyia gya no ho

a anuanom atwa ne ho ahyia,

na ɔte sɛ tweneduro foforɔ a ɛwɔ Lebanon

na mmɛ nnua atwa ne ho ahyia.

13Na Aaron mmammarima no nyinaa wɔ wɔn animuonyam mu

kurakuraa Awurade afɔdeɛ wɔ wɔn nsam

wɔ Israel asafo no nyinaa anim.

14Na ɔrewie afɔrebukyia so som no,

na ɔrehyehyɛ afɔdeɛ ama Ɔsorosoroni Tumfoɔ no,

15ɔtenee ne nsa maa kuruwa no so

na ɔhwiee nsa afɔdeɛ a ɛyɛ obobe mogya no;

ɔhwie guu afɔrebukyia no ase,

ohwam a ɛsɔ Ɔsorosoroni no, adeɛ nyinaa so hene no ani.

16Afei Aaron mma no teaa mu;

na wɔhyɛnee wɔn totorobɛnto a wɔ odwumfoɔ de dadeɛ ayɛ no;

wɔde yɛɛ dede kɛseɛ

a ɛyɛ nkaeɛ adeɛ wɔ Ɔsorosoroni no anim.

17Ɛnna nnipa no nyinaa yɛɛ ntɛm

hwehwee fam de wɔn anim butubutuu fam

de sɔree wɔn Awurade,

Otumfoɔ Nyankopɔn, Ɔsorosoroni no.

18Afei adwontofoɔ no de wɔn nne yii no ayɛ

wɔn ɛnne dɛdɛ ne ɛdwom a ɛwɔ soro.

19Na Awurade Ɔsorosoroni nkurɔfoɔ no bɔɔ

wɔn mpaeɛ wɔ Mmɔborɔhunufoɔ no anim,

kɔsii sɛ wɔde Awurade somyɛbea no baa awieeɛ,

na wɔwiee ne som no.

20Afei Simon siane bae na ɔmaa ne nsa so

wɔ Israel asafo no so, sɛ ɔde n’ano reka Awurade nhyira,

na wahyɛ ne din no animuonyam;

21na wɔbɔɔ wɔn mu ase sɔree wɔ ne mprenu so,

de gyee nhyira firii Ɔsorosoroni no nkyɛn.

Nhyira

22Na afei nhyira nka abɔdeɛ nyinaa Nyankopɔn,

ɔno a ɔyɛ anwanwadeɛ akɛseɛ wɔ baabiara,

na ɔne yɛn di no sɛdeɛ ne mmɔborɔhunu teɛ no.

23Ɔmma yɛn anigyeɛ akoma,

na asomdwoeɛ mmra yɛn berɛ so

wɔ Israel, sɛdeɛ na ɛteɛ wɔ tete nna no mu no.

24Ma ɔmfa ne mmɔborɔhunu nnom yɛn,

na ɔnnye yɛn wɔ yɛn nna yi mu!

Awieeɛ

25Aman mmienu na me kra kyiri wɔn,

na deɛ ɛtɔ so mmiɛnsa no mpo deɛ wɔnyɛ ɔman:

26Wɔn a wɔte Seir, ne Filistifoɔ

ne nkwaseafoɔ a wɔte Sekem no.

27Nkyerɛkyerɛ a ɛwɔ nteaseɛ ne nimdeɛ ho

na matwerɛ no wɔ nwoma yi mu,

Sirak ba Eleasa, a n’agya ne Yesu wɔ Yerusalem,

ɔno na ɔfiri n’adwene mu ka nyansasɛm pii.

28Nhyira ne wɔn a nnoɔma yeinom ho hia wɔn,

na wɔn a wɔde sie wɔn akoma mu no bɛyɛ anyansafoɔ.

29Na sɛ wɔde yɛ adwuma a, wɔbɛyɛ te sɛ biribiara,

ɛfiri sɛ Awurade suro ne wɔn akwan.