Mmebusɛm 19 - Twer? Kronkron（ASWDC）

Tenenee hia

1 Mmb 28.6 Ohiani a ɔnam ne pɛyɛ mu yɛ

sene deɛ ɔkyea n’anomu nsɛm na ɔyɛ kwasea.

2Ɔkra a nimdeɛ abɔ no nyɛ,

na deɛ ne nan ase yɛ herɛ no yɛ bɔne.

3 Kwa 3.39 Onipa agyimisɛm kyinkyim ne kwan,

na n’akoma huri tia AWURADE.

4 Mmb 14.20 Ahonya ma obi nya nnamfo pii,

na mmɔborɔni ne ne yɔnko ntam tete.

5 Mmb 19.9; 21.28; Deut 19.18-21 Ɔdansekurumfoɔ ho renyɛ tɔtorɔtɔɔ,

na deɛ ɔhu atorosɛm no rennya adwaneyɛ.

6Nnipa pii dɛfɛdɛfɛ ɔdɛɛfoɔ,

na nnipa nyinaa yɛ ɔyamyiefoɔ nnamfo.

7 Mmb 19.4 Ohiani nuanom nyinaa tane no,

na nkantom sɛ ne nnamfonom ne ne ntam rentwe,

ɔde nsɛm ti wɔn a, ɔnto wɔn.

8Deɛ ɔnya nyansa no dɔ ne kra,

deɛ ɔbu nhunumu no, ɔhunu papa.

9 Mmb 19.5 Ɔdansekurumfoɔ ho renyɛ tɔtorɔtɔɔ,

na deɛ ɔhu atorosɛm no bɛyera.

10Taamudie mfata ɔkwasea,

na mprɛ ahe na akoa bɛdi mpanimfoɔ soɔ.

11Onipa nimdeɛ twentwɛn n’abufuo ase,

na mfomsoɔ ho twa yɛ no animuonyam.

12 Mmb 20.2; 16.14-15 Ɔhene abufuo te sɛ gyata mmobom,

na n’anisɔ te sɛ wira so bosuo.

13 Mmb 10.1 Ɔba kwasea yɛ n’agya mmusuo,

na ɔbaa ntɔkwako yɛ daa nsuo a ɛsosɔ.

14 Mmb 18.22 Efie ne ahodeɛ yɛ agyanom awunnyadeɛ,

na ɔyere nimdefoɔ firi AWURADE.

15 Mmb 10.4; 23.21 Aniha yɛ nnahɔɔ,

na onipa kwadwofoɔ bɛdi kɔm.

16 Mmb 16.17 Deɛ ɔkora mmara asɛm no kora ne kra,

na deɛ ɔnhwɛ n’akwan yie no bɛwu.

17 Mmb 14.31; Dwom 41.1-3; Mat 25.40 Deɛ ɔhunu mmɔborɔni mmɔborɔ de fɛm AWURADE,

na deɛ ɔde ama no, ɔbɛhyɛ no ananmu.

18 Efe 6.4 Anidasoɔ wɔ hɔ yi, tea wo ba,

na mmɔ wo tirim sɛ wobɛku no.

19Deɛ n’abufuo so no bɛnya asotwe,

na sɛ wogyaa no a, wobɛsane agyaa no bio.

20Tie afotuo na gye atenetene,

na woahunu nyansa w’akyirinna mu.

21 Mmb 16.9; Yer 10.23 Adwene pii wɔ onipa akoma mu,

nanso AWURADE agyinatuo na ɛbɛgyina.

22Onipa adɔeɛyɛ na ɛma wɔdɔ no,

na ohiani yɛ sene ɔtorofoɔ.

23 Mmb 14.27 AWURADE suro de obi kɔ nkwa mu,

deɛ ɔkura mu no bɛmee ada, na bɔne biara renka no.

24 Mmb 26.15 Ɔkwadwofoɔ de ne nsa to ayowa mu,

na ɔnsane mfa nkɔ n’anomu mpo.

25 Mmb 21.11 Bɔ ɔfɛdifoɔ, na atetekwaa ani bɛte,

na ka nhunumufoɔ anim, na wahunu nimdeɛ mu.

26Deɛ ɔbɔ n’agya atirimuɔden na ɔpamo ne na no

yɛ aniwuo ne ahohora ba.

27 Yak 1.22 Me ba, wogyae atenetene tie a,

wobɛfom afiri nimdeɛ nsɛm ho bio.

28Ɔdansehuhuni di atemmuo ho fɛw,

na abɔnefoɔ ano mene mmusuo.

29 Mmb 26.3 Wɔasiesie atemmuo ama afɛdifoɔ

ne mmaabɔ ama nkwaseafoɔ akyi.