Mika 3 - Twer? Kronkron（ASWDC）

Ɔkasa tia ɔman no mu atitire

1Na mese:

Montie ɛ, Yakob atitire

ne Israel fie atemmufoɔ,

ɛnyɛ mo na ɛsɛ sɛ mohunu atemmuo?

2Mo na motane papa na modɔ bɔne,

modwa wɔn wedeɛ firi wɔn ho,

ne wɔn nam firi wɔn nnompe ho,

3 Dwom 14.4 na mo na moadi me man nam,

na moaworɔ wɔn wedeɛ afiri wɔn ho,

na moabubu wɔn nnompe mu,

na moatwitwa no sɛ kukuo mu adeɛ,

ne ɛsɛn mu nam.

4Ɛno na wɔbɛsu afrɛ AWURADE,

nanso ɔremmua wɔn,

na ɔde n’anim bɛhunta wɔn berɛ no mu,

sɛdeɛ wɔmaa wɔn nneyɛɛ yɛɛ bɔne no.

5Sei na AWURADE ka tia adiyifoɔ

a wɔdaadaa me man

na wɔde wɔn se ka

na wɔka sɛ: Asomdwoeɛ!

na deɛ ɔmfa biribi nhyɛ wɔn anomu no,

wɔkyere ne so sa no.

6Saa nti adeɛ bɛsa mo, mo anisoadehunu ho,

na esum aduru mo, mo nkɔmhyɛ ho,

na owia bɛtɔ adiyifoɔ no so,

na adekyeeɛ adane wɔn so sum kabii;

7na adehunufoɔ no ani bɛwuwu,

na nkɔmhyɛfoɔ no anim asinsiam,

na wɔn nyinaa bɛmuamua wɔn ano,

ɛfiri sɛ Nyankopɔn mmuaeɛ biara nni hɔ.

8 Yes 58.1 Na me deɛ, AWURADE honhom

mu tumi ne atemmuo ne mmaninyɛ

ahyɛ me ma,

sɛ menkyerɛ Yakob ne mmarato,

ne Israel ne bɔne.

9Montie yei ɛ, Yakob fie atitire

ne Israel fie atemmufoɔ,

mo a mokyiri atemmuo

na mokyea deɛ ɛtene nyinaa,

10 Hab 2.12 mo a mokyekyere Sion, mogyahwieguo mu

ne Yerusalem, akontonkyideɛ mu.

11 Yer 7.4 Emu atitire gye adanmudeɛ bu atɛn,

na emu asɔfoɔ gye akatua kyerɛkyerɛ,

na emu adiyifoɔ gye sika hyɛ nkɔm,

na wɔtwere AWURADE ka sɛ:

Ɛnyɛ AWURADE na ɔwɔ yɛn ntɛm yi?

Bɔne biara remma yɛn so.

12 Yer 9.10; 26.18 Saa nti, mo nti

wɔbɛfɛntɛm Sion sɛ afuo,

na Yerusalem adane aboɔ akuakuo,

na efie no bepɔ adane kwaeɛ sorɔnsorɔmmea.