1 Pedro 4 - Bible in Quechua of South Conchucos（qxo）

Jutsata mana ruranantsikpä ninqan

1Noqantsik raykur Jesucristo kay patsachö ñakashqa kaykaptinqa qamkunapis ñakayänaykipä listu kaykäyay. Jesucristuman criyikuyanqaykipita ñakarqa jutsa ruraypäqa manam yarpäyankinatsu.

2Tsaynö kawarmi mana alli yarpaynikikunata rurayankinatsu, sinöqa kay patsachö kawayanqaykiyaq Tayta Dios munanqannö kawayanki.

3Puntataqa wakin runakunanölla jutsata rurarmi warmipis ollqupis jukwan jukwan kakuyarquyki, mana allikunata rurayarquyki, machäyarquyki y ïdulukunata adorayarquyki. Kananqa amana tsaynö kawayaynatsu.

4Puntata kawayanqaykinö manana kawayaptikim amïguykikuna mana tantiyar contraykikuna parlayan.

5Peru paykunataqa kawaqkunata y wanushqakunata juzgaq Tayta Diosmi cuentata mañanqa.

6Llapan runakunata juzgananpä kaptinmi Jesucristupa alli willakuyninta willakuyarqan. Tsaymi criyikuqkuna wanushqana karpis Tayta Diospa puntanchöna kawaykäyan.

Yanapanakunapä ninqan

7Kay patsa ushakänanpä pöcullanam faltan. Tsaynö kaykaptinqa Tayta Dios munanqannö kawayänaykipä yarpachakur imay hörapis Tayta Diosta mañakuyay.

8Imanö karpis llapan shonquykikunawan kuyanakuyay. Rasunpa kuyakuq runaqa imata rurayaptinpis perdonanmi.

10Tayta Diosmi kuyapäyäshurniki imaykaläya habilidäta qarayäshurquyki. Tsay habilidäta chaskiyanqaykimanmi jukniki juknikipis yanapanakuyanki. Tsaynö yanapanakurqa Tayta Dios munanqannömi kawaykäyanki.

11Willakuyänaykipä habilidäta chaskishqa kaykarqa Tayta Diospa willakuyninta willakuyay. Wakinta yanapayänaykipä habilidäta chaskishqa kaykarqa Tayta Dios yanapayäshunqaykinö yanapayay. Tsaynöpam Jesucristo raykur Tayta Dios llapanchöpis alabashqa kanqa. ¡Tayta Diosqa imayyaqpis poderyuqmi! ¡Payqa imayyaqpis alabashqa kaykullätsun! Amén.

Ñakarpis kushikunapä ninqan

12Kuyay wawqikuna y panikuna, imayka pruëbakunata päsarpis ama llakikur niyaytsu <<¿imanirrä pasaypa ñakä?>>

13Tsaypa rantinqa Jesucristo ñakanqannö ñakarpis kushikuyay. Tsaynö ñakarpis kay patsaman chipipirrä kutimunan junaqmi pasaypa kushikuyanki.Rom. 8.17; 1Ped. 4.1.

14Tayta Diospa poderösu Espïritun qamkunawan kaykaptinqa Jesucristuman criyikuyanqaykipita ashlliyäshuptikipis kushikuyay.

15Runa mayikikunata wanutsiyanqaykipita, suwa kayanqaykipita, imaykamanpis llutalla mëtikuyanqaykipita o imatapis llutankunata rurayanqaykipita ñakarqa penqakuypämi kayanki.

16Jesucristuman criyikuyanqaykipita ñakarqa ama penqakuyaytsu. Tsaypa rantinqa salvayäshunqaykipita Tayta Diosta kushishqa alabayay.

17Jesucristuman yärakuqkuna ñakayänanpä tiempu chämushqanam. Noqantsikchö ñakaykuna qallaykaptinqa Tayta Diospa alli willakuyninta mana cäsuq runakuna ¡imanörä ñakayanqa!

18Tayta Diosta cäsur kawaqkunapis ñakarrä salvakuykäyaptinqa Diosta mana cäsukuqkunaqa ¡imanörä kayanqa!

19Tayta Dios munanqannö kawayanqaykipita ñakarpis kamamaqnintsik Tayta Diosman yärakur allikunata imaypis rurayanki. Payqa ima päsayäshuptikipis manam qonqayäshunkitsu.