Daniel 3 - Bible in Quechua of South Conchucos（qxo）

Qoripita rurashqa monumentuta adorayanqan

1Tsaypitanam rey Nabucodonosor qoripita juk monumentuta ruratsirqan kimsa chunka (30) metru altuta y kimsa metru anchuta. Tsay monumentutam Babilonia provinciachö kaykaq Dura niyanqan pampaman ichïtsirqan.

2Tsaypitanam qayatsirqan nacionta mandayiqninkunata, prefectukunata, gobernadorkunata, yätsikuqkunata, tesorërukunata, juezkunata, markachö autoridäkunata y provinciakunachö kaykaq wakin autoridäkunatapis. Paykunatam qayatsirqan monumentuta ichïtsinqanpita kushikur fiestata rurayänanpä.

3Tsaynö qayatsiptinmi nacionta mandayiqninkuna, prefectukuna, gobernadorkuna, yätsikuqkuna, tesorërukuna, juezkuna, marka autoridäkuna y provinciakunachö kaykaq wakin autoridäkunapis monumentu ichïtsinqan kaqman llapan qorikäyarqan.

4Tsaychömi willakuq runa jinchipa qayakur nirqan: <

5Imay hörapis cornëta, këna, taksha arpa, guitärra, jatun arpa, zampöña y mas wakin instrumentukuna waqamunqanta wiyar juk yarpaylla llapaykikuna rey Nabucodonosor ichïtsinqan monumentuta adorayänaykipä qonqurikuyay.

6Mayqaykipis tsay monumentuta qonquriykur mana adorayaptikiqa jinan höram pasaypa wayllashqa jornuman qaykushqa kayanki>>.

7Órden mantsariypä kaptinmi instrumentukunata tukayämunqanta wiyar entëru markakunapita y nacionkunapita shamuq runakuna ima idiömata parlaq karpis qonqurikuykur rey Nabucodonosor ichïtsinqan qori monumentuta adorayarqan.

8Tsaypitanam juk ishkay Babilonia runakuna aywayarqan rey kaqman. Chaykurmi Israel runakunapa contran

9Nabucodonosorta niyarqan: <<¡Qamlla imayyaqpis rey kaykullay!

10Qammi ordenarquyki cornëtata, kënata, taksha arpata, guitärrata, arpata, zampöñata y mas wakin instrumentukunatapis tukamuqta wiyar qoripita ruratsinqayki monumentupa puntanman qonquriykur llapanpis adorayänanpä.

11Tsaynöllam ordenarquyki qonquriykur monumentuta mana adoraq kaqta wayllashqa jornuman qaykatsinaykipä.

12Tsaynö ordenaykaptikipis kanmi Babilonia provinciaman mandar yanapayäshunaykipä churanqayki juk ishkay Israel runakuna ninqaykita mana cäsukuq. Tayta rey, qam adoranqayki dioskunata paykunaqa manam adorayantsu. Tsay runakunaqa ruratsinqayki qori monumentuta adorayänanpä ordenaykaptikipis manam adoraykäyantsu. Tsay runakunaqa Sadrac, Mesac y Abed-negum kaykäyan>>.

13Tsaynö niyaptinmi Nabucodonosorqa pasaypa rabyashqa qayatsimurqan Sadracta, Mesacta y Abed-neguta. Tsay jövinkuna reypa puntanman chaykuyaptinmi

14Nabucodonosor nirqan: <<¿Rasunpaku qamkuna diosnïkunatapis y qoripita ruratsinqä monumentutapis adorayankitsu?

15Kananqa cornëtata, kënata, taksha arpata, guitärrata, arpata, zampöñata y wakin instrumentukunatapis tukamuqta wiyar ras qonquriykur ruratsinqä monumentuta adorayay. Mana adorayaptikiqa pasaypa wayllashqa jornumanmi qaykatsiyäshayki. Tsaynö ruraptï ¿ima diosrä salvayäshunki?>>

16Niptinmi Sadrac, Mesac y Abed-nego Nabucodonosorta niyarqan: <

17Wayllashqa jornuman qaykayämaptikipis sirviyanqä Tayta Diosnïmi tsay jornupita y makikipitapis salvayämanqa.

18Mana salvayämaptinpis noqakunaqa manam diosnikikunata sirviyäshätsu ni tsay ruratsinqayki monumentutapis adorayäshätsu>>.

Wayllaykaq jornupita Tayta Dios salvanqan

19Sadrac, Mesac y Abed-nego tsaynö niyaptinmi Nabucodonosor pukayayparä rabyar jornu wayllätsiqkunata ordenarqan qanchis kuti mas wayllätsiyänanpä.

20Tsaypitam valienti soldädukunata mandarqan Sadracta, Mesacta y Abed-neguta pankaykur wayllashqa jornuman qaykuyänanpä.

21Tsaynö ruraskirmi tsay jornuman cäpantinta, llanqintinta, uma wankukunantinta y llapan jatiranqan röpantinta qaykuyarqan.

22-23Qaykuyaptinmi tsay jövinkunaqa makin chakin pankashqa jornu rurinchöna rikakuyarqan. Empëñu qaykuyänanpä rey ordenaptinmi pasaypa wayllashqa jornu kar qaykuq soldädukunata rupaskirqan. Tsaymi Sadracta, Mesacta y Abed-neguta qaykuq soldädukuna jinan höra wanuyarqan.

24Tsayta rikaykurmi jamaraykanqanpita shärirkur Nabucodonosor pasaypa mantsakashqa yätsiqninkunata nirqan: <<¿Manaku kimsan jövinkunata pankarkur jornuman qaykatsirquntsik?>>

Tsaynö niptinmi paykuna niyarqan: <>.

25Tsaymi nirqan: <<¡Jornu rurinchö chusku runakuna kachaylla y mana rupakuypa puriykaqtam rikaykä! ¡Paykunawan kaykaq runaqa juk dios niraqmi kaykan!>>

26Tsaypitam Nabucodonosor jornu kaqman aywaykur qayarqan: <<¡Poderyuq Diosta adoraq Sadrac, Mesac y Abed-nego! ¡Yarqaskamur shayämuy!>>

Tsaymi kimsan jövinkuna jornupita yarqayämurqan.

27Yarqayämuptinmi paykuna kaqman nación mandayiqninkuna, prefectukuna, gobernadorkuna y yätsikuqkuna rikayänanpä qorikäyarqan. Tsaychömi rikayarqan tsay jövinkunata ichikllapis nina mana rupanqanta. Aqtsallanpis ni röpallanpis mana rupashqa kaptinmi ni rupashqanöpis asyäyarqantsu.

28Tsaymi Nabucodonosor nirqan: < mandamushqa. Diosninman yärakurmi noqa ordenanqätapis cäsuyashqatsu. Paykunaqa juk dioskunata adorayänanpa rantinmi wanuyänanpäpis listu kayashqa.

29Manam ima diospis tsaynöqa salvantsu. Pï runatapis Sadrac, Mesac y Abed-nego adorayanqan Diospa contran parlaq kaqtaqa ichik ichiklla roquyätsun. Wayinkunatapis kayayätsun. Tsaynö katsun may nacionpita kaptinpis y ima idiömata parlaptinpis>>.

30Tsaypitanam Sadracta, Mesacta y Abed-neguta Nabucodonosor churarqan Babilonia provinciachö mandaq autoridä kayänanpä.