2 Corintios 6 - Bible in Quechua of South Conchucos（qxo）

1Willakuqnin karmi kuyakuq Tayta Diosta mana yupaytupäyänaykipä qamkunata rugayä.

2Palabranchömi nin:

<

Salvanäpä kaq junaqmi qamta yanaparqü>>.

Tayta Dios kuyapäyäshunayki höraqa kanan höram kaykan. Tayta Dios salvayäshunayki junaqqa kanan junaqmi kaykan.

Imanö ñakarpis Pablo willakunqan

3Noqakuna willakuyanqäta pipis manakaqman mana churayänanpämi imatapis llutanta rurayätsu.

4Tsaypa rantinqa Tayta Diosta sirviq kayanqäta tantiyakuyänanpämi pay munanqannölla kawayä imanö ñakarpis, ima faltäyämaptinpis, pasaypa llakirpis,

5castigayämaptinpis, carcelman wichqayämaptinpis, maqayämaptinpis, pishipashqa willakurpis y punuyta mikuyta mana tarirpis.

6Tsaynöllam Tayta Diosta sirviq kayanqäta tantiyakuyänanpä jutsata mana ruraypa kawayä, willakuyninta shumaq tantiyakuyä, chikiyämaqnïkunata perdonayä, pïmaytapis kuyapäyä, Espíritu Santupa poderninchö kawayä, pïmaytapis kuyayä,

7Diospa willakuyninta willakuyä y pay yanapayämaptin imatapis allita rurayä. Conträ shäriyaptinpis pay munanqannö allillatam rurayä.

8Wakin runakunam alli rikayäman y wakinnam mana alli rikayäman. Tsaynöllam wakinqa favornï parlayan y wakinnam conträ parlayan. Rasun kaqllata parlayaptïpis llullakuyanqätam yarpäyan.

9Wakinqa reqiyämarpis manam reqiq tukayämantsu. Ushakäyanqäta yarpäyaptinpis kawaykäyärämi. Chikiyämar ñakatsiyämarpis manam wanutsiyämashqatsu.

10Llakishqa karpis kushishqallam kawaykäyä. Pobri karpis atskaqta rïcuyätsiqnömi kaykäyä. Imäkuna mana kaptinpis noqakunapam llapanpis kaykan.

11Corinto wawqikuna y panikuna, llapan shonqükunawan kuyarmi imatapis mana pakaypa llapan yarpäyanqäta willayarqü.

12Qamkunata kuyar mana qonqaypa yarparaykaptïqa ¿imanirtä qonqayämarquyki?

13Tsaymi wamräkunatanö niyä: Noqakuna kuyayanqänö qamkunapis kuyayämar yarpaykayällämay.

Tayta Diospa templun kanqantsik

14Wawqikuna y panikuna, musyayanqaykinöpis manam pipis törutawan ashnuta yüguntsu. Tsaynöllam qamkunapis Jesucristuman mana criyikuqkunawan yügukäyankimantsu. Alli ruraypis manam mana alli ruraywan iwalantsu. Aktsi kanqanchöpis tsakay manam kantsu.

15Jesucristupis Belialwan manam tantiyanakuyantsu. Tsaynöllam Jesucristuman criyikuqkunawan mana criyikuqkunapis tantiyanakuyantsu.

16Tsaynöllam Tayta Diospa templunman ïdulukunata jamatsiyanqan allitsu. Noqantsikqa imayyaqpis kawaq Tayta Diospa templunmi kantsik.

17Mastapis palabranchö nin:

<

Paykunapita yarqukuyay.

Imatapis impüruyätsikuqkunata ama yatayaytsu.

Tsaynö kawayaptikim chaskiyäshayki.

18Qamkunapa papänikim kashä.

Qamkunam wamräkuna kayanki.

Llapanpä poderyuq Tayta Dios karmi tsaynö nï>>.