Proverbios 4 - Bible in Quechua of South Conchucos（qxo）

Allita rurar kawananpä yätsinqan

1Wamrakuna, papänikikuna yätsiyäshunqaykita shumaq cäsukuyay.

Yätsiyäshunqaykita cäsukurqa yachaq runam kayanki.

2Noqaqa allita rurayänaykipämi qamkunata yachatsï.

Yachatsinqäkunata imaypis ama qonqayaytsu.

3Noqapis papänïwanmi shaksharqü.

Mamäpis kuyamarmi wätamashqa.

4Kuyamarmi papänï nimarqan:

<

Willanqäkunata cäsukurqa allim kawanki.

5Yachaq kayta imanöpapis ashiy.

Yachatsinqäkunata imaypis ama qonqaytsu.

6Yachaytaqa kuyanki.

Imaypis ama dëjankitsu.

Tsaynöpam mana alli ruraykunaman mëtikunkitsu.

7Yachaq kanaykipä ima ruraytapis dëjaskir yachakuy.

8Yachaq kaptikim pïmaypis respitayäshunki.

9Yachaq karmi kuyayllapä corönashqanö kanki>>.

10Hïju, yätsinqäkunata wiyakuy.

Wiyakurqa atska watam kawanki.

11Shumaq tantiyaykur kawanaykipämi yachatsï.

Alli nänipa purinaykipämi yachatsï.

12Alli nänipa purirqa manam mana alliman chankitsu.

Cörrirpis manam ishkinkitsu.

13Yachatsinqäkunata mana qonqaypa ruray.

Tsaykunata cäsukurqa alli kawaytam tarinki.

14Mana alli runakuna kawayanqannöqa ama kawaytsu.

Paykuna jutsata rurayaptinpis qamqa jutsata ama ruraytsu.

15Mana alli rurayninta ama ruraytsu.

16Paykunaqa jutsa rurayta manam dëjayantsu.

Pitapis jutsata mana ruratsirqa punuytapis manam tariyantsu.

17Mallaqaypanörä y yakunaypanörämi jutsa rurayta munayan.

Paykunaqa imanöpapis runa mayintam atacayta munayan.

18Alli ruraq runakuna kawayanqanqa patsa waraptin atsikyaqnömi kaykan.

Patsa waraskiptin mas atsikyanqannömi tsay runakunapis qoyay qoyay shumaq kawayan.

19Peru jutsa ruraq runakunapa kawayninkunam sïqa pasaypa tsakaqnö kaykan.

Tsaynö karmi jutsata rurayanqantapis musyayantsu.

20Hïju, tantiyatsinqäkunata chaskikuy.

Ninqäkunata imaypis yarparay.

21Yätsinqäkunata ama qonqaytsu.

Ninqäkunataqa imaypis umaykichö tsararay.

22Ninqäkunata yachakuqkunaqa alli kawaytam tariyanqa.

Qeshyayänanpa rantinmi sänu kawayanqa.

23Shonquyki allita yarpaptinqa allim kawanki.

Tsaynö kaykaptinqa shonquykita shumaq cuiday llutanta mana yarpänaykipä.

24Runa mayikita ama tumpaytsu.

Imaypis ama llullakuytsu.

25Jutsaman mana ishkinaykipä shumaq cuidakuy.

26Imanö kawanqaykitapis shumaq tantiyakuy.

Nänipita mana yaqaypa aywaqnö imaypis allillata ruray.

27Mana alli ruraykunataqa ama ruraytsu.

Jutsa ruraypita witikuy.