1¡Aleluya!
Kushikuypämi salmukunata cantar Tayta Diosnintsikta alabanqantsik.
Payta alabarmi kushikuntsik.
2 Tayta Diosmi Jerusalénta yapay shäriykätsin.
Israel runakunatam mashtakashqa kaykaqta qoriykämun.
3Llakishqa kaykaqkunatam kushikatsin.
Qerinkunatapis jampinmi.
4Qoyllurkuna ayka kayanqantapis musyanmi.
Llapan qoyllurkunatapis jutinpam reqin.
5Tayta Diosqa llapanpä poderyuqmi.
Paypa yachayninqa mana ushakaqmi.
6Pobrikunatapis Tayta Diosmi yanapan.
Mana alli ruraq runakunatam sïqa penqakuyman churan.
7 Tayta Diosta agradëcikur alabashun.
Arpata tukar salmukunata cantar Tayta Diosnintsikta alabashun.
8Paymi ciëlutapis pukutaywan tsapan.
Paymi tamyatapis tamyatsimun.
Qewakunatapis jirkakunachömi wiñatsimun.
9Paymi ashmakuna mikuyänanpäpis qewata wiñatsimun.
Pushapa ankakuna mallaqar waqayaptinpis mikuytam qaran.
10 Tayta Diosqa manam guërrapä caballukunata rikartsu kushikun.
Manam pelyayta yachaq soldädukunata rikartsu kushikun.
11Sinöqa payta mantsapakushqam kushikun.
Tsaynöllam kushikun kuyakuq kanqanman yärakushqa.
12¡Jerusalénchö täraqkuna, Tayta Diosta alabayay!
¡Siónchö täraqkuna, Tayta Diosta alabayay!
13Paymi markaykipa punkunkunapa trancantapis siguran.
Markaykichö täraqkunamanmi bendicionninta churan.
14Lindëruykita respitatsiptinmi tranquïlu taykäyanki.
Mikuynikikuna atska kananpämi bendicionninta churamun.
15Tayta Diosmi kay patsa imanö kananpäpis mandan.
Mandaptinmi ras cumplin.
16Paymi yuraq bayëta mashtaykushqatanörä rashtatapis rashtatsimun.
Qajapatapis uchpatanörämi warätsimun.
17Tayta Diosmi rumitanörä runtu tamyatapis tamyatsimun.
Tsaymi mana awantaypä alan.
18Tayta Dios mandaptinmi tsururupis tsullun.
Paymi vientutapis vientutsimun y yakutapis cörritsin.
19Jacobpita miraqkunatam palabranta musyatsirqan.
Israel runakunatam estatütunkunata y ninqankunata musyatsirqan.
20Tsaynöqa wakin nacionkunata manam musyatsirqantsu.
Paykunaqa manam imaypis Tayta Dios ninqanta musyayashqatsu.
¡Aleluya!
Who We AreWhat We EelieveWhat We Do
2025 by iamachristian.org,Inc All rights reserved.
