Salmo 6 - Bible in Quechua of South Conchucos（qxo）

Salmo 6Llakikur Tayta Diosta mañakunqan 1 (1) Cantaqkunapa mandaqninpämi. Puwaq cuerdayuq instrumentuta tukar cantayanki. David qellqanqan salmu.

1 1 (2) Tayta Dios, rabyarninpis ama ñakaykatsillämaytsu.

Ajashqa karpis ama castigaykallämaytsu.

2 2 (3) Tayta Dios, kuyapaykallämay.

Pasaypa kallpaynaqmi kaykä.

Tayta Dios alliykatsillämay.

Entëru cuerpümi tsuktsukyaykan.

3 3 (4) Pasaypa llakishqam kaykä.

Tayta Dios, ¡imayyaqrä yanapamankitsu!

4 4 (5) Tayta Dios, kutimur yanapaykallämay.

Kuyapämar wanuypita salvaykallämay.

5 5 (6) Wanuskirqa manam yarpäyäshunkinatsu.

Patsa rurinpitaqa ¿pirä alabashunki?

6 6 (7) Ikyaypa ikyarmi waqaykä.

Cada paqas waqaptïmi jawnäpis weqïwan jutuykan.

7 7 (8) Qoyay qoyay waqaptïmi ñawïpis rikannatsu.

Runakuna conträ shäriyaptin pasaypa waqaywanmi ñawïtapis oqraykäna.

8 8 (9) Mana alli ruraqkuna, ¡ñöpäpita witiyay!

Tayta Diosmi waqanqäta wiyamashqa.

9 9 (10) Rugakunqätam Tayta Dios wiyamashqa.

Mañakunqätam Tayta Dios chaskimashqa.

10 10 (11) Conträkunaqa pasaypa mantsakarmi penqakushqa quëdayanqa.

Paykunaqa illaqpitam penqakurnin qeshpiyanqa.