1¡Aleluya!
Tayta Diosta alabayay.
Sirviqninkuna, Tayta Diosta alabayay.
2 Tayta Diospa wayinchö kaqkuna, payta alabayay.
Tayta Diosnintsikpa wayin patiuchö kaqkuna, payta adorayay.
3Allillata ruraq kanqanpita Tayta Diosta adorayay.
Kuyakuq kanqanpita salmukunata cantar alabayay.
4Jacobpita miraq runakunatam paypa kayänanpä Tayta Dios akrarqan.
Israel runakunatam herencian kayänanpä akrarqan.
5Musyämi Tayta Dios poderösu kanqanta.
Payqa llapan dioskunapitapis mas poderyuqmi.
6Ciëluchö, kay patsachö, lamarchö y lamar rurinkunachöpis Tayta Diosqa munanqantam ruran.
7Kay patsapa kuchunpitam pukutayta shäritsin.
Tamyamunanpäpis maqakatsimunmi.
Churarätsinqanpitam vientutapis jipimun.
8Egipto runakunapa mayor tsurinkunatam wanutsirqan.
Ashmankunapa punta kaq wawankunatapis wanutsirqanmi.
9Faraón y mandar yanapaqninkuna rikayänanpämi Egiptuchö espantaypä kaqkunata rurarqan.
10Atska nacionkunachömi runakunata wanutsirqan.
Munayyuq reykunatapis ushakätsirqanmi.
11Tsay reykunam kayarqan amorreo runakunapa mandaqnin Sihón, Basánchö täraq rey Og y cananeo runakunapa mandaqnin reykunapis.
12Tsay runakunapa nacionninkunatam kuyanqan Israel runakunata entregarqan herenciankuna kananpä.
13 Tayta Dios, mana ushakaqmi kanki.
Qamtaqa imayyaqpis yarpäyäshunkim.
14 Tayta Diosmi kuyanqan runakunata yanapanqa.
Sirviqninkunataqa kuyapanqam.
15Juklä nación runakuna adorayanqan ïdulukunaqa qoripita y yuraq qellaypitam.
Tsaykunataqa runakunallam rurayan.
16Shimin kaptinpis manam parlayantsu.
Ñawin kaptinpis manam rikayantsu.
17Rinrin kaptinpis manam wiyayantsu.
Manam jamayninpis kantsu.
18Ïdulu poderniynaq kanqannömi ïdulukunata ruraqkunapis kayan.
Ïdulukunaman yärakuqkunaqa ïdulunöllam llapanpis kayan.
19Israel mayikuna, ¡Tayta Diosta alabayay!
Aarónpita miraqkuna, ¡Tayta Diosta alabayay!
20Leví trïbu runakuna, ¡Tayta Diosta alabayay!
Tayta Diosta mantsapakuqkuna, ¡payta alabayay!
21 Siónchöpis y maytsaychöpis Tayta Dios alabashqa kaykullätsun.
Paymi Jerusalénchö taykan.
¡Aleluya!
Who We AreWhat We EelieveWhat We Do
2025 by iamachristian.org,Inc All rights reserved.
