1Mandayta qallanqan witsanmi Jotamqa ishkay chunka pitsqa (25) watayuq kaykarqan. Payqa chunka joqta watam Jerusalénpita mandarqan. Mamanmi Sadocpa tsurin Jerusa karqan.
2Jotamqa papänin Uzíasnömi Tayta Dios munanqannö kawarqan. Peru Tayta Diospa templunmanmi sïqa papäninnö yaykurqantsu. Tayta Dios munanqannö Jotam kawaptinpis mandanqan nacionchö täraq runakunaqa jutsa rurayllachömi kawayarqan.
3Jotammi Tayta Diospa templun jana waqtan murällapa punkunta churatsirqan. Tsaynöllam Ofel jirkanchö pirqatapis allitsatsirqan.
4Judá nación jallqakunachö markakunata shäritsirmi muntikunachöpis amparakuna wayikunata y törrikunata ruratsirqan.
5Tsaynöllam amonita runakunapa mandaqnin reyta soldädunkunawan Jotam vincirqan. Vinciskirmi amonita runakunata kimsa watayaq impuestuta pägatsirqan. Tsaymi cada wata pägayarqan kimsa waranqa kimsa pachak (3,300) kïlu qellayta, chunka waranqa (10,000) säcu trïguta y chunka waranqa säcu cebädata.
6Tayta Dios munanqannö kawarmi Jotamqa mas poderyuq karqan.
7Jotam imata ruranqan y soldädunkunawan yarqur guërrata ruranqanpis llapanmi Judá nacionpa y Israel nacionpa mandaqnin reykunapa acta librunchö qellqashqa kaykan.
8Mandayta qallanqan witsanmi Jotamqa ishkay chunka pitsqa (25) watayuq kaykarqan. Payqa chunka joqta watam Jerusalénpita mandarqan.
9Jotam wanuskiptinmi Davidpa Markanman pampayarqan. Paypa trokinnam tsurin Acazna rey karqan.
Who We AreWhat We EelieveWhat We Do
2025 by iamachristian.org,Inc All rights reserved.
