1 1 (1b) Tayta Dios, qamtam llapan shonqüwan mañakamü.
2Tayta Diosllä, qamllamanmi yärakamü.
Runakuna penqakatsimänanta ama munaykullaytsu.
Conträkuna asipämänanta ama permitiykullaytsu.
3Mayqanpis qamman yärakamuqkunaqa penqakuyman churashqa ama kaykuyällätsuntsu.
Contrayki shäriqkuna sïqa penqakuyman churashqa kaykuyällätsun.
4 Tayta Dios, alli kawanäpä nänikita reqiykatsimay.
Munanqaykinö kawanäpä nänikipa pushaykallämay.
5Jutsata mana ruranäpä willakuynikita tantiyaykatsillämay.
Qamllam salvamaqnï Tayta Dios kanki.
Imay hörapis qamllamanmi yärakamü.
6 Tayta Dios, imaypis kuyamarquykim.
Kuyamanqaykita ama qonqaykullaytsu.
7Jövin kaykar jutsata ruranqäta ama yarparaykullaytsu.
Tayta Dios, kuyapäkuq kaykarqa yarpaykallämanki.
8 Tayta Diosqa alli ruraqmi.
Jutsa ruraqkuna pay munanqannö kawayänanpämi alli nänita rikatsin.
9Humildi kaqkunatam tantiyatsin.
Allillata rurayänanpämi yachatsin.
10Ruranqan pactuta y mandamientunkunata cumpliqkunataqa kuyanmi.
Awninqannöllam mana dëjaypa yanapan.
11 Tayta Dios, alläpa jutsayuqmi kallä.
Kuyakuq kanqayki musyakänanpä perdonaykallämay.
12 Tayta Diosta mantsapakuqkunatam alli kawayänanpä kikin tantiyatsin.
13Paykunamanmi bendicionninta imaypis churan.
Paykunapita miraqkunatam herenciankuna aypun.
14 Tayta Diosmi payta mantsapakuqkunapa amïgun.
Pactuta rurar awninqannöllam bendicionninta churan.
15 Tayta Diosllamanmi imaypis mañakü.
Ima peligrupitapis paymi tsapäman.
16Taytay, pïnïpis mana kaptinmi pasaypa llakishqa kaykä.
Ñakanqäta rikar kuyapaykallämay.
17Qoyay qoyaymi shonqü pasaypa llakinan.
Kay llakikuypita jipiykallämay.
18Alläpa ñakanqäta y llakikunqäta tantiyaykullay.
Jutsäkunapita perdonaykallämay.
19Taytay, conträkunam atskaq kaykäyan.
Wanuyparä chikiyämanqanta rikaykullay.
20¡Tsay runakunapita salvaykallämay!
¡Paykunapita tsapaykallämay!
Taytay, qamllamanmi yärakamü.
21Qamman yärakurmi allillata rurä.
Munanqaykinö kawaykaptïqa tsapaykallämay.
22Tayta Dios, contrankunapita Israel runakunata salvaykullay.
Who We AreWhat We EelieveWhat We Do
2025 by iamachristian.org,Inc All rights reserved.
