Salmo 37 - Bible in Quechua of South Conchucos（qxo）

Salmo 37 (36)Mana alli runakuna y alli runakuna imanö kayanqan 1a (1a) David qellqanqan salmu.

1 1 (1b) Mana alli ruraq runakunapita ama rabyakuytsu.

Paykunata ama nanaparaytsu.

2Paykunaqa llullu qewa tsakir ushakanqannömi ushakäyanqa.

3 Tayta Diosman yärakur allikunata ruray.

Kay patsachö kawanqaykiyaq pay munanqannö kaway.

4 Tayta Diosta kushishqa sirviy.

Tsaynö kawaptikiqa shonquyki munanqantam alistapäshunki.

5Llapan llakikuynikikunata Tayta Diospa poderninman churay.

Payman yärakuptikim yanapashunki.

6Tsaymi alli runa kanqaykita llapan musyayanqa.

Tsayqa kanqa rupay yarqamuptin llapan rikakunqannömi.

7 Tayta Diosman yärakur ama llakikuytsu.

Yanapashunaykipä pacienciakur shuyay.

Runa imaykayuqpis kaptin ama rabyakuytsu.

Mana allita rurananpä yarpaptinpis ama cäsuytsu.

8Ama imapitapis llutallaqa rabyakuytsu ni ajanaytsu.

Rabyarqa mana allikunatam ruranki.

9Mana alli ruraq runakunataqa Tayta Diosmi ushakätsinqa.

Peru payman yärakuqkunam sïqa entreganqan nacionchö alli kawayanqa.

10Pöcullanam faltan mana alli ruraq runakuna ushakäyänanpä.

Mayjina ashirpis manam tarinkitsu.

11Peru alli shonquyuqkunam sïqa Tayta Dios entreganqan nacionchö alli kawayanqa.

Paykunaqa kushishqam kawayanqa.

12Mana alli ruraq runaqa alli runakunatam wanuyparä chikin.

Imata ruraptinpis nanaq nanaqrämi rikapaykan.

13Tsaynö kawayaptinmi Tayta Dios asikun.

Payqa musyanmi höran chämuptin ushakätsinanpä kanqanta.

14Mana alli ruraq runakunaqa espädankunata jipiskirmi flëchankunatapis alistakuyan.

Pobrikunata, humildikunata y alli ruraq runakunata wanutsiyänanpämi alistakushqa kaykäyan.

15Tsaynö kaykaqtam kikinkunapa espädanwan shonqunkunapa tuksiyanqa.

Flëchankunatapis chipyaqmi pakir ushayanqa.

16Rïcu kar mana alli ruraq kanantsikpa rantin pobrilla karpis alli runa kanqantsikmi mas alli kaykan.

17Mana alli ruraq runakunataqa Tayta Diosmi chipyaq ushakätsinqa.

Peru alli runakunatam sïqa yanapanqa.

18 Tayta Dios munanqannö kawaqkunataqa mana dëjaypam cuidan.

Paykuna chaskiyänanpä kaq herenciankunaqa manam imaypis ushakanqatsu.

19Ñakay witsanpis allim kawayanqa.

Hambrüna witsanpis mikuynin atskam kanqa.

20Mana alli ruraq runakunaqa tsaki qewanömi rupar ushakäyanqa.

Tayta Diospa contran runakunaqa qoshninömi illakäyanqa.

21Mana alli ruraq runakunaqa prestakurpis manam kutitsiyantsu.

Peru alli runakunam sïqa kuyapäkuq kar pïmaytapis yanapayan.

22 Tayta Diospa bendicionninta chaskiq runakunaqa chaskiyanqan nacionchömi alli kawayanqa.

Peru maldicionanqan kaq runakunam sïqa ushakäyanqa.

23Runa imanö kawananpäpis Tayta Diosmi permitin.

Pay munanqannö kawananpämi tantiyatsin.

24Makinpita jancharmi ishkiptinpis joqarkun.

25Wamra kanqäpita rukuyanqäyaq manam imaypis rikarqütsu alli ruraq runa hambrünachö kaykaqta.

Tsaynölla manam rikarqütsu wamrankunatapis mañakur puriykaqta.

26Alli runaqa kuyapäkuq karmi hambrünachö kaqkunata yanapan.

Wamrankunapis kuyapäkuqmi kayan.

27Mana allikunata ruranaykipa rantin allillata ruray.

Tsaynö kawarqa imaypis tranquïlum kawanki.

28Allita ruraptikim Tayta Dios kushikun.

Pay munanqannö kawaqkunataqa manam imaypis dëjantsu.

Peru mana alli runakunatam sïqa miraqninkunatapis ushakätsin.

29Alli runakunaqa Tayta Dios entreganqan nacionchömi imayyaqpis täyanqa.

30Alli runaqa shumaq yarpachakuskirmi imatapis parlan.

Yachaq runaqa rasun kaqllatam imatapis parlan.

31Tayta Diospa leyninkunatam shonqunchö yarparan.

Tsaymi imaypis mana allikunataqa rurantsu.

32Mana alli ruraq runaqa alli runata wanutsinanpämi maypa aywaptinpis watiqaraykan.

33Tsaynö kaptinpis wanutsinanta Tayta Dios manam permitintsu.

Ni tumpayänanpäpis manam dëjantsu.

34 Tayta Diosman yärakuy.

Pay munanqannö imaypis kaway.

Tsaynö kawaptikiqa pay entregashunqayki nacionchö kushishqa kawanaykipämi yanapashunki.

Rikaykaptikim mana alli ruraq runakunata ushakätsinqa.

35Rikarqümi mana alli ruraq runakuna runa mayinta maytsaychöpis munanqanta ruraykätsiqta.

36Tsaynö kaykäyanqanchömi illakäyashqa.

Paykunataqa mayjina ashirpis manam tarirqütsu.

37Tayta Dios munanqannö kawaq runata rikar tantiyakuy.

Alli kawaq runaqa kushishqam kawanqa.

38Peru jutsasapa runakunam sïqa chipyaq ushakäyanqa.

Paykunaqa ushakäyänanpänam kaykäyan.

39Alli runakunataqa Tayta Diosmi imaykachöpis yanapan.

Paykunatam imayka ñakaykunapitapis cuidan.

40Mana alli ruraq runakunapa makinpita qeshpiyänanpämi yanapan.

Tayta Diosman yärakuyaptinmi tsaynö yanapan.