Salmo 48 - Bible in Quechua of South Conchucos（qxo）

Salmo 48 (47)Sión jirkanchö Tayta Dios täkunqan 1 (1) Cantanapä. Corépita miraqkuna qellqayanqan salmu.

1 1 (2) Tayta Diosnintsikqa poderösum.

Täkunqan markachö payta imaypis alabashun.

Sagrädu jirkanchö payta imaypis adorashun.

2 2 (3) Sión jirkanqa kuyayllapämi kaykan.

Tsay jirkanta rikarmi entëru kay patsachö runakuna kushikuyan.

Norti läduchömi tsay jirkan kaykan.

Llapanpä poderyuq Reymi tsaychö taykan.

3 3 (4) Tayta Diosmi rikachakuna törrikunapita Jerusalén markata cuidan.

Paymi Jerusalénchö täraqkunata imapitapis tsapan.

4 4 (5) Reykuna qorikaykurmi Jerusalénta atacayänanpä aywayarqan.

5 5 (6) Tayta Dios cuidaykanqanta rikaykurmi pasaypa mantsakäyarqan.

Ima ruraytapis mana puëdirmi jinan höra qeshpir aywakuyarqan.

6 6 (7) Warmita qeshyakunanpä nanay tsarinqannömi paykunata pasaypa mantsariy tsarirqan.

7 7 (8) Tarsispita shamuq büquikunata shukukuy vientu chipyaq ushakätsinqannömi tsay runakunata ushakätsirquyki.

8 8 (9) Llapanta mandaq Tayta Diosnintsik täranqan markachö tsaynö päsanqantam rikarquntsik.

Tsaynöllam unay päsanqantapis willamarquntsik.

Tayta Diosmi Jerusalénta imaypis cuidanqa. Selah

9 9 (10) Tayta Dios, templuykiman qorikarmi kuyakuq kanqaykita yarpäyä.

10 10 (11) Poderyuq kanqaykita musyarmi entëru kay patsachöpis alabaykäyäshunki.

Poderyuq karmi imaypis allillata ruranki.

11 11 (12) Sión jirkanchöpis kushikuyätsun.

Judá markakunachöpis kushikuyätsun.

Runakunata favornin mana shäriypa juzganqaykipita kushikuyätsun.

12 12 (13) Sión jirkanpa tumayay.

Ayka törrikuna kanqantapis yupayay.

13 13 (14) Marka murällatapis y amparakuna wayinkunatapis shumaq rikayay.

Waray warantin qepa yuriqkunata imanö kanqantapis willayänaykipä rikayay.

14 14 (15) Tayta Diosqa imaypis Diosnintsikmi.

Paymi wanunqantsikyaqpis cuidamantsik.