Salmo 45 - Bible in Quechua of South Conchucos（qxo）

Salmo 45 (44)Rey casaraptin cantapanqan 1 (1) Cantaqkunapa mandaqninpämi. Liriu waytakuna niyanqan cantupa tönunwan kay salmuta cantayanki. Corépita miraqkuna qellqayanqan salmum. Kuyanqanta cantapanqan.

1 1 (2) Kuyayllapä cantum shonqüchö kaykan.

Tsay cantutam reyta kushishqa cantapäshä.

Shumaq cantukunatam payta cantapäshä.

2 2 (3) Llapan runakunapitapis mas kuyayllapämi kanki.

Maypis wiyay munaymi parlanki.

Tayta Diosmi bendicionninta qamman imaypis churamun.

3 3 (4) Allish chölu kanaykipä tseqllaykiman espädaykita jatikuy.

Espädaykiwanrämi orgullösu ichiranki.

4 4 (5) Poderyuq karmi caballuta muntarkur vinciq vinciqllana guërraman aywanki.

Awniyämanqaykita cumplir defiendiyämänaykipämi yarqunki.

Humildikunapa janan pelyarmi mana alli ruraq runakunata imaypis vincinki.

Derëcha kaq makikiwanmi pasaypa mantsariypä kaqkunata imaypis ruranki.

5 5 (6) Qampa flëchaykikunam fïlu punta.

Flëchaptikim contraykikunapa shonqunmanpis yaykun.

Llapan contrayki nacionkunatam vincinki.

6 6 (7) Tayta Dios, trönuykichömi imayyaqpis mandaq kanki.

Qamqa llapantapis allim mandanki.

7 7 (8) Pipis allita ruraptinqa kushikunkim.

Mana allita ruraptinqa rabyakunkim.

Tsaymi Tayta Dios qamta churashurquyki pïmaypitapis mas kushishqa kanaykipä.

8 8 (9) Mïrra mïrra, áloe áloe y canëla canëlam röpaykikunapis mushkun.

Kuyayllapä marfilwan adornashqam palaciuykikunapis.

Tsaychö arpakunata tukayaptinmi kushikunki.

9 9 (10) Palaciuykichöqa princesakunapis atskam kaykäyan.

Derëcha kaq läduykichömi casaranaykipä reina jamaykan.

Paypa röpanqa Ofirpita apamunqan qori püruwan adornashqam kaykan.

10 10 (11) Hïja, shumaq wiyamay.

Kanan yätsinqäta shumaq tantiyay.

Marka mayikikunapä y castaykikunapä ama yarpaynatsu.

11 11 (12) Kuyayllapä kaptikim rey kuyashunki.

Runayki kaykaptinnaqa payllatana cäsunki.

12 12 (13) Tiro markapita runakunam qarayäshunaykipä imallatapis apakurkur qamman shayämunqa.

Rïcu runakunapis yanapanaykipämi rugakuyäshunki.

13 13 (14) Churakänanpä kaq jipashmi kuyayllapä kaykan.

Röpanpis qoriwan adornashqa karmi chipipiykan.

14 14 (15) Kuyayllapä bordashqa röpan jatishqatam rey kaqman pushaykäyan.

Jipashkunapis qepantam aywaykäyan.

Yanasankunapis fïlayllapam aywaykäyan.

15 15 (16) Pasaypa kushikurmi reypa palaciunman yaykuykäyan.

16 16 (17) Tayta rey, tsurikikunapis unay castaykikunanömi rey kayanqa.

Paykunatam mandar yanapayäshunaykipä maytsay markakunaman churanki.

17 17 (18) Kay cantanqäta cantarmi runakuna imaypis yarpäyäshunki.

Entëru nacionchömi imaypis alabayäshunki.