Salmo 138 - Bible in Quechua of South Conchucos（qxo）

Salmo 138 (137)Tayta Diosta agradëcikunqan 1a (1a) David qellqanqan salmu.

1 1 (1b) Llapan shonqüwanmi alabashayki.

Salmukunata cantarmi ciëluchö poderyuq kaqkunapis wiyayänanpä alabashayki.

2Qamman y palabraykimanqa manam imapis iwalantsu.

Tsaymi santu templuyki lädupa qonqurikuykur alabashayki.

Kuyapäkuq kanqaykipita y awninqaykita cumpliq kanqaykipitam alabashayki.

3Mañakamuptïmi wiyamarqayki.

Valuratsimarmi kallpata qaramarqayki.

4 Tayta Dios, palabraykita wiyarmi kay patsachö llapan reykunapis alabayäshunki.

5Ruranqayki alli kanqanta musyarmi kushikur alabayäshunki.

Pasaypa poderyuq y kuyapäkuqmi kanki.

6 Tayta Dios, ciëlupitam humildi runakunata yanapaykämunki.

Allish tukuqkunataqa manam cäsunkitsu.

7Ñakaptïpis qammi yanapamanki.

Chikimaqnïkuna pasaypa rabyar conträ shäriyaptinpis derëcha makikiwanmi tsapämanki.

8 Tayta Dios, noqapä yarpanqaykitam imaypis cumplinki.

Imaypis kuyamankim.

Kuyaykämarqa ama jaqiykallämaytsu.