Romanos 5 - Bible in Quechua of South Conchucos（qxo）

Tayta Dios salvamanqantsikpita kushikunqantsik

1Señornintsik Jesucristuman criyikur perdonashqa karmi Tayta Dioswan allina kawaykantsik.

2Jesucristuman criyikushqam Tayta Dios kuyapämarnintsik perdonamantsik. Tsaymi gloriaman pushamänantsikpä kanqanta musyar kushikuntsik.

3Tsaynöllam kushikuntsik imanö ñakarpis payman criyikunantsikpä Tayta Dios tantiyatsimanqantsikta musyar.

4Criyikunantsikpä tantiyatsimashqam Tayta Dios munanqannö kawayta yachakuntsik. Pay munanqannö kawarmi gloriaman qorimänantsikpä kanqanta musyantsik.

5Qorimänantsikpä kaqtaqa manam manakaqllapätsu shuyaykantsik. Tayta Diosmi qaramanqantsik Espíritu Santuwan tsayta musyatsimantsik. Espíritu Santum shonquntsikchö musyatsimantsik Tayta Dios rasunpa kuyamanqantsikta.

6Salvakuyta mana puëdishqam Tayta Dios destinanqan junaq noqantsik raykur Jesucristo wanurqan.

7Alli runapa rantin pipis wanuyta mana munaptin capazmi pillapis paypa rantin wanunman.

8Peru Jesucristum sïqa jutsayuq kaykashqapis noqantsik raykur wanurqan. Tsaynöpam Tayta Dios kuyamanqantsikta musyatsimantsik.

9Jesucristo yawarninta jichanqanpita Tayta Dios perdonaykämarnintsikqa ¿manatsurä castïgunpita salvamäshun?

10Tayta Diospa contran kaykashqa Tsurin wanunqanpita perdonaykämarnintsikqa ¿manatsurä kawamunqanpita salvamäshun?

11Manam tsaypis tsayllatsu, sinöqa Señornintsik Jesucristo wanunqanpita perdonashqana karmi Tayta Diosta kushishqa alabantsik.

Adánpita wanuy shamuptinpis Jesucristupita salvación shamunqan

12Jutsata y wanuytapis juk runalla kay patsaman apamunqanpitam

Manam Adánnötsu Jesucristuqa kaykan.

15Jutsata Adán ruranqanpitam atska runakuna wanuyan. Jesucristo wanunqanpitam atska runakuna salvakuyan. Tsaynö salvakuyan Tayta Dios y Jesucristupis kuyapäkuq kaptinmi.

16Jutsata rurashqa karmi Adánqa iwalantsu Tayta Dios mandamunqan Jesucristuman. Jutsata Adán ruranqanpitam llapan runa castigashqa kayänanpä kaykäyan. Jesucristo noqantsik raykur wanunqanpitam Tayta Dios perdonamantsik.

17Jutsata Adán ruranqanpita llapan runakuna wanuyaptinpis Jesucristuman criyikuqkunaqa mana ushakaq kawaytam tariyanqa. Tsaynö tariyanqa Tayta Dios kuyapäkuq kar debaldilla perdonaptinmi.

18Adán mana cäsukuq kanqanpitam llapan runakuna castigashqa kayänanpä kayarqan. Peru Jesucristo cäsukuq kanqanpitam sïqa llapan runakuna perdonashqa kar salvacionta tariyanqa.

19Tsaymi juk runa Tayta Diosta mana cäsunqanpita llapan runakuna jutsata rurayan. Tsaynöllam juk runa Tayta Diosta cäsunqanpita atskaq runakunata jutsaynaqtana Tayta Dios chaskinqa.

20Tayta Diosmi leyninkunata musyatsimarquntsik jutsayuq kanqantsikta tantiyakunantsikpä. Jutsayuq kashqapis Tayta Dios kuyapäkuq karmi llapan jutsantsikta perdonaykämantsik.

21Runakuna jutsankunapita wanuyaptinpis Tayta Dios kuyamarnintsikmi Señornintsik Jesucristo wanunqanpita perdonamantsik puntanchö imayyaqpis kawanantsikpä.