1 1 (1b) Kay patsachö täraqkuna, Tayta Diosta kushishqa alabayay.
2Paypa jutinchö adorayay.
Poderösu kanqanpita llapan shonquykikunawan alabayay.
3Tayta Diosta alabar niyay:
< Poderösu kaptikim contraykikunapis puntaykiman qonqurikayämun. 4Kay patsachö täraqkunaqa llapanmi adorayäshunki. Alabanzakunata cantarmi alabayäshunki>>. Selah 5Tayta Dios ruranqanta rikaq shayämuy. Favornintsik shärir espantaypä ruranqanta rikayay. 6Paymi Puka Lamartapis tsakitsirqan. Mayuta tsakiskatsirmi unay castantsikkunata päsatsirqan. ¡Tayta Diosta alabar kushikuyay! 7Poderösu kayninwanmi imayyaqpis mandanqa. Entëru naciontam imanö kanqantapis rikan. Jutsasapakuna paypa contran ama shäriyätsuntsu. Selah 8¡Entëru nacionchö täraq runakuna, Tayta Diosnintsikta alabayay! ¡Maytsayman wiyakaqpä payta alabayay! 9Paymi kananyaqpis kawayta qaramantsik. Contrantsikkuna mana wanutsimänapämi tsapämantsik. 10Tayta Dios, tsaynö karpis pruëbamanmi churayämarquyki. Qellayta tsullutsir qanranta jipiqnömi purificayämarquyki. 11Trampamanmi ishkitsiyämarquyki. Pasaypa ñakaymanmi churayämarquyki. 12Mana alli ruraqkunapa poderninchömi katsiyämarquyki. Imayka atskayashqa mayupa päsaqnö y lunyaykaq ninapa päsaqnömi ñakayarqü. Tsaypitaqa alli kawayänäpämi yanapayämarquyki. 13Templuykiman yaykurmi sacrificiukunata qampä rupatsishä. Tsaychömi cumplishä 14pasaypa llakikunqä höra qamta awninqäta. 15Sacrificiuta rupatsinäpämi wera ashmakunata apamushä. Törukunata, chïvukunata y carnërukunatam apamushä. Selah 16¡Tayta Diosta mantsapakuq kaqkuna, llapaykikuna wiyayänaykipä shayämuy! Tayta Dios imanö yanapamanqantam willayäshayki. 17Llapan shonqüwanmi Tayta Diosta mañakurqä. Llapan yarpaynïwanmi payta alabarqä. 18Jutsa ruraynïkunata mana dëjaptïqa mañakunqäta Tayta Dios manam wiyamanmantsu karqan. 19Mañakunqäta wiyamarmi rugakunqänö yanapamashqa. 20¡Tayta Dios alabashqa kaykullätsun! Payqa mañakunqätam wiyashqa. Kuyamanqantam musyatsimashqa.
Who We AreWhat We EelieveWhat We Do
2025 by iamachristian.org,Inc All rights reserved.
