Proverbios 11 - Bible in Quechua of South Conchucos（qxo）

1Pësun faltaykaqta rantikuptinmi Tayta Dios rabyan.

Peru pësun complëtuta rantikuptinmi sïqa kushikun.

2Runa tukuqkunaqa mana alli rikashqam kaykan.

Peru llänu shonqu runam sïqa shumaq tantiyakun.

3Alli ruraq runaqa Diosta cäsurmi kawan.

Peru mana alli ruraq runam sïqa jutsata ruranqanpita ushakan.

4Tayta Dios juzganan junaqqa rïcu kanqanpis manam välinqatsu.

Peru alli ruraq runam sïqa salvakunqa.

5Alli ruraq runaqa manam alläpa ñakanqatsu.

Peru mana alli runam sïqa llutanta ruranqanpita ñakanqa.

6Alli runapaqa manam pipis contran shärintsu.

Ambiciösu runapämi sïqa pïmaypis contran shärin.

7Mana alli ruraq runaqa imaykayuqpis kananpä yarpachakuykanqallanchömi ushakanqa.

8Alli ruraq runataqa ima ñakaypitapis Tayta Diosmi salvan.

Peru mana alli ruraq runatam sïqa ñakananpä jaqiskin.

9Mana alli runaqa nanaq shiminpa parlarmi runa mayinta llakikatsin.

Peru alli ruraq runam sïqa tantiyakuq kar alli kawananpä yätsin.

10Alli ruraq runapa imanpis kaptinqa marka mayinkunapis kushikuyanmi.

Tsaynöllam mana alli runa wanuptinpis kushikuyan.

11Alli ruraq runa bendisaptinqa marka mayinkuna allim kawayan.

Peru mana alli ruraq runa manakaqkunata willaptinmi sïqa rimanakuykällar qarqunakuyan.

12Mana tantiyakuq runaqa runa mayintapis penqakuymanmi churan.

Peru tantiyakuq runam sïqa upälla kakun.

13Tullu shimi runaqa imata musyanqantapis willakurmi purin.

Peru confiakuypä runam sïqa imata willaptinpis upällakun.

14Juk nacionchö mandakuq mana alli mandaptinqa pasaypam ñakayan.

Yätsikuqkuna atskaq kayaptinqa mandakuqpis allim mandan.

15Mana reqishqa runata garantizarqa jaqam rikakun.

Pitapis mana garantizarqa tranquïlum kawakun.

16Alli yarpayyuq warmitaqa pïmaypis allim rikan.

Arukuq runaqa rïcuyanmi.

17Kuyapäkuq runaqa kikinpis kushishqam kawan.

Peru mana kuyapäkuq runam sïqa llakishqa kawan.

18Mana alli ruraq runa gänanqanqa manakaqllachömi ushakan.

Peru alli ruraq runa gänanqanmi sïqa ushakantsu.

19Alli ruraq runaqa tranquïlum kawan.

Peru mana alli ruraq runam sïqa manaräpis höranchö wanun.

20Mana alli yarpayyuq runataqa Tayta Dios manam rikaytapis munantsu.

Peru alli ruraq runata rikarmi sïqa kushikun.

21Mana alli ruraq runaqa imay karpis castigashqam kanqa.

Peru alli ruraq runam sïqa salvashqa kanqa.

22Mana tantiyakuq warmiqa kuyayllapä karpis

kuchipa senqanchö qori sortïja jatiraykaqnömi kaykan.

23Alli ruraq runa yarpanqanqa llapanpis allim kaykan.

Peru mana alli ruraq runa yarpanqanmi sïqa pïmaytapis rabyanätsin.

24Runa mayinta imallawanpis yanapaqkunaqa mastam tariyan.

Peru mana yanapakuqkunam sïqa hambrünaman chäyan.

25Runa mayinta imallawanpis yanapaqkunaqa bendiciontam chaskiyan.

Imallawanpis yanapakuqkunaqa yanapashqam kayanqa.

26Trïgun kaykaptin rantikuyta mana munaptinqa maldicionayanmi.

Peru rantikuptinmi sïqa agradëcikuyan.

27Alli ruraq runataqa pipis respitanmi.

Peru mana alli ruraq runatam sïqa desgracia päsanqa.

28Riquëzanman yärakuq runaqa muntipa rapran tsakiqnömi ushakanqa.

Peru alli ruraq runam sïqa qewa tseqlliqnö alli kawanqa.

29Mana yachaq runa castankunata inkaraptinmi qallayar aywakuyanqa.

Tsaymi kikillan quëdaskir yachaq runapa sirviqninna kanqa.

30Alli runaqa alli wayuq plantanömi kaykan.

Paytaqa pïmaypis yachananmi.

31Tayta Diosta cäsuq runaqa allita ruranqanpitam premiuta kay patsachö chaskin.

Peru Tayta Diosta mana cäsuq runam sïqa jutsata ruranqanpita castigashqa kanqa.