2 Timoteo 1 - Bible in Quechua of South Conchucos（qxo）

Apóstol Pablo saludakunqan

1Noqa Pablutam Jesucristupa apostolnin kanäpä Tayta Dios churamashqa. Jesucristuman criyikurmi Tayta Dios promitinqannö mana ushakaq kawayta tarirqü.

2Timoteo,Hech. 16.1-3. kuyay tsurïnö kaptikim kay cartata cartakamü. Papänintsik Tayta Dios y Señornintsik Jesucristo kuyapäshurniki alli kawanaykipä yanapaykulläshuy.

Mana mantsariypa willakunanpä ninqan

3Unay castäkuna sirviyanqan y noqapis sirvinqä Tayta Diosta mañakurmi paqaspa junaqpapis qampä agradëcikü.

4Waqar quëdamunqaykita yarparmi kushikunantsikpä kutimuyta munaykä.

5Noqa musyämi Tayta Diosman yärakur pay munanqannö kawanqaykita. Awilayki Loida y mamayki Eunicipis Tayta Diosman yärakur kawayanqannömi qampis kawaykanki.

6Tsaynö kawaykarqa mana mantsariypa Tayta Diosta imaypis sirviy. Payta sirvinaykipämi Tayta Dios churashurquyki makïta umaykiman churaykur qampä mañakunqä höra.

7Manam mantsarinantsikpätsu Tayta Dios churamarquntsik, sinöqa mana mantsariypa willakunantsikpä, pïmaytapis kuyanantsikpä y shumaq tantiyakur imatapis ruranantsikpämi.

8Tsaynö kaykaptinqa mana penqakuypa Jesucristupa willakuyninta willakuy. Alli willakuyninta willakunqäpita prësu wichqarätsiyämaptinpis ama penqakuytsu. Imanö ñakarpis alli willakuyninta willakuy. Tsaynö willakunaykipämi Tayta Dios yanapaykäshunki.

Tayta Dios salvamanqantsikta Pablo willakunqan

9Tayta Dios salvamarnintsikmi qayamarquntsik pay munanqannö santu kanantsikpä. Manam imatapis allita ruranqantsikpitatsu salvamarquntsik, sinöqa jutsayuq kashqapis kuyapämarnintsikmi salvamarquntsik. Kay patsata manarä kamarmi Jesucristuman churamarnintsik tsaynö kuyapämarquntsik.

10Kuyapämanqantsiktam musyatsimarquntsik salvamaqnintsik Jesucristuta kay patsaman mandamur. Paymi willakuyninchö ninqannö wanuyta vinciskir mana ushakaq kawayta qaramarquntsik.

11Alli willakuyninta willanäpä Tayta Dios churamaptinmi apostolnin kar yachaykätsï.

12Willakunqäpita carcelchö ñakarpis Jesucristumanmi yärakü. Paymi qorikamänan junaqyaq poderninwan yanapamanqa. Tsaymi carcelchö wichqararpis penqakütsu.

13Timoteo, Jesucristupa willakuyninta yachatsinqänölla qampis yachatsiy. Jesucristo kuyashunqaykinölla payman criyikur pïmaywanpis kuyanakur kaway.

14Jesucristupa willakuyninta pipis llutanta yachatsiptinqa wawqikunata y panikunata mana chaskiyänanpä tantiyatsiy. Tantiyatsinaykipä Espíritu Santum yanapashunki. Paymi yanapamänantsikpä imaypis noqantsikwan kaykan.

Pabluta Onesíforo yanapanqan

15Musyanqaykinömi Asia provinciachö täraq wawqikuna y panikuna llapan dëjayämashqa. Tsaynöllam Figeluwan Hermógenespis aywakuyashqa.

16Onesíforuta y castankunatapis Señor Jesucristo yanapaykullätsun. Carcelchö prësu kaykaptïpis mana penqakuypam imaypis yanapamashqa.

17Tsaynöllam Romaman chaykamurpis tarimanqanyaq ashimarqan.

18Musyanqaykinöpis Éfeso markachö shumaqmi yanapamarquntsik. Runakunata juzganan junaq Señor Jesucristo payta kuyapaykullätsun.