Joel 1 - Bible in Quechua of South Conchucos（qxo）

Murukuykunata chukllushkuna chipyaq ushanqan

1 Tayta Dios revelanqantam Petuelpa tsurin Joel willakur nirqan:

2Mayor runakuna, kanan ninqäta shumaq wiyayämay.

Judá nacionchö täraq runakunapis, kanan willanqäta wiyayämay.

Kay castïgutanöqa ¿imayllapis rikayarquykitsurä?

Papänikikuna kawanqan witsan kaynö mantsaypä castïgu ¿imayllaqa kashqatsurä?

3Kay castïgu imanö kanqantapis tsurikikunata willayanki.

Tsurikikunapis tsurinkunata willayanqa.

Tsaynölla willkaykikunapis tsurinkunata willayanqa.

4Jatusaq chukllushkuna dëjayanqantapis ichishaq chukllushkunam ushayashqa.

Ichishaq chukllushkuna dëjayanqantapis shiwrikunam ushayashqa.

Tsaynöllam llapan quëdaqkunatapis ushayashqa.

5Machashqa kakuq runakuna, tantiyakuyay.

Machashqa kayanqaykipita rikcharkur waqayay.

Chukllushkuna üvata ushaptinmi upuyänaykipä vïnupis kannatsu.

6Yupaytapis mana atipaypä soldädukunanömi tsay chukllushkuna markantsikman juntäyämushqa.

Kirunkunapis curmïllunkunapis leonpanörämi fïlu.

7Llapan üvakunatapis chakranpam ushayashqa.

Hïgustapis pasaypam ushayashqa.

Yuranta y rämankunatapis tullullantanam dëjayashqa.

8Casarananpä awninqan jövin wanuskiptin soltëra jipash lütu röpata jatikurkur waqanqannö ikyaypa ikyar waqayay.

9Sacerdötikunapis waqaykäyan tsaki mikuy ofrendata ni vïnutapis Tayta Diospa templunman pipis manana apaptinmi.

10Trïgupis manam kannatsu.

Üvapa yurankunapis chipyaqmi tsakishqa.

Olïvuskunapis chipyaqmi ushakashqa.

Llapan chakrakunapis pasaypa jäkuqllanam kaykäyan.

11Chakrachö aruqkuna, üvata cosechaqkuna, makikikuna tsoqpashqa waqayay.

Trïgutapis cebädatapis wallällam muruyarquyki.

12Üvapa yurankunapis chipyaqmi tsakishqa.

Hïguskunapis chipyaqmi ushakäyashqa.

Granadïllakunapa, palmërakunapa, manzänapa yurankuna y llapan plantakunapa yurankunapis chipyaqmi tsakishqa.

Tsaymi runakunapis pasaypa mantsakashqa kaykäyan.

13Tayta Diosta altarchö sirviq sacerdötikuna, lütu röpata jatikurkur waqayay.

Tsaki mikuypis ni vïnupis Tayta Diosnintsikpa wayinman apayämunanpä mananam kannatsu.

14Mayor runakunata y llapan runakunata Tayta Diosnintsikpa wayinman qorikäyänanpä qayatsiyay.

Tayta Diosta mañakur llapaykikuna ayunayay.

15¡Allaw noqantsik, Tayta Dios juzganan junaq chaykämunnam!

Tsay junaq chämuptin ¡allaw imanörä runakuna ñakayanqa!

Tsay junaqmi llapanpä poderyuq Tayta Dios atskaq runakunata ushakätsinqa.

16Mikuynintsik ushakaptinmi pasaypa mallaqaychö kaykantsik.

Tsaymi Tayta Diosnintsikpa templunman aywarpis kushikuntsiknatsu.

17Murunqantsik trïgupis manam jeqamushqanatsu.

Mikuy churakuna wayikunachöpis vientullanam tumaykan.

18Qewata maychöpis mana tarirmi wäkakunapis pasaypa kuyapaypä waqaykäyan.

Tsaynömi üshakunapis cabrakunapis wanur ushakaykäyan.

19¡Tayta Dios, yanapaykayällämay!

Jirkachö qewatapis y muntikunatapis ninam rupar ushashqa.

20Raqrapa aywaq yakupis tsakishqam.

Desiertuchö qewakunatapis ninam ushashqa.

Tsaymi jirka ashmakunapis qamman mañakamur waqapaykäyäshunki.