Salmo 119 - Bible in Quechua of South Conchucos（qxo）

Salmo 119 (118)Palabranpita Tayta Diosta alabanqanÁlef

1Kushishqam kawayan Tayta Dios munanqannö kawaq runakuna.

Paykunam Tayta Diospa leyninkunata cumpliyan.

2Kushishqam kawayan Tayta Dios mandanqankunata cumpliqkuna.

Paykunam llapan shonqunkunawan payta ashiyan.

3Manam ni imaypis mana allikunata rurayantsu.

Sinöqa Tayta Diosta cäsurmi imaypis allillata rurayan.

4Tayta Dios, qammi yachatsikuynikikunata qellqatsirqayki mana qonqaypa cumpliyänäpä.

5¡Ima allirä kanman estatütuykikuna ninqanta cumpliptï!

6Mandamientuykikunata cumplirqa manam ni imapitapis penqakushätsu.

7Mandanqaykikunata yachakurqa llapan shonqüwanmi qamta alabashayki.

8Estatütuykikunataqa imaykanöpapis cumplishämi.

¡Ama jaqiykallämaytsu!

Bet

9¿Imanöparä jutsa rurayta jövin jaqinman?

Jutsa ruraytaqa jaqinqa palabraykita cäsurmi.

10Llapan shonqüwanmi qamta ashï.

Mandamientuykikunata imaypis cäsunäpä yanapaykallämay.

11Qampa contrayki jutsata mana ruranäpämi palabraykita shonqüchö imaypis yarparaykä.

12 Tayta Dios, pïmaypis alabaykulläshuy.

Estatütuykikunata yachaykatsillämay.

13Noqaqa llapan ninqaykitam willakuykä.

14Mandanqaykikuna ninqannö kawarmi imayka riquëzakunata tarir kushikunqäpitapis mas kushikü.

15Yachatsikuyniki ninqannö kawanäpämi imaypis yarpachakü.

Munanqaykinö kawanäpämi imaypis yarparä.

16Estatütuykikunata cumplirmi kushikü.

Palabraykitaqa manam imaypis qonqashätsu.

Guímel

17Sirviqniki karmi qamta rugä alli kawanäpä.

Palabraykitaqa imaypis cäsushämi.

18Ñawïta kichaqnö shumaq tantiyaykatsillämay.

Tsaynöpam leynikichö espantaypä kaqkunata tantiyashä.

19Kay patsachöqa qorpallam kä.

Mandamientuykikunata mana qonqanäpä yanapaykallämay.

20Llapan shonqüwanmi imay hörapis ninqaykikunata cumpliyta munä.

21Yachaq tukuqkunatam imaypis castiganki.

Mandamientuykikunata mana cäsuyanqanpitam maldicionashqa kayanqa.

22Runakuna chikiyämar manakaqman mana churayämänanpä tsapaykallämay.

Noqaqa mandanqaykikunatam cäsü.

23Poderyuq runakunam conträ shäriyänanpä willanakuyan.

Tsaynö kaptinpis sirviqniki karmi estatütuykikunata cumplinäpä imaypis yarparaykä.

24Mandanqaykikunata cumplirmi kushikü.

Alli kawanäpämi tsaykuna tantiyatsiyäman.

Dálet

25Wanukuykänam.

Awnimanqaykinö alli kawayta qaraykallämay.

26Yarpachakunqäta willaptïmi wiyamar yanapamarquyki.

Estatütuykikunata yachaykatsillämay.

27Yachatsikuynikikunata tantiyaykatsillämay.

Espantaypä ruranqaykikunatam imaypis yarparäshä.

28Pasaypa llakikuywanmi chipyaqna aywapakaskï.

Palabraykiwan animaykatsillämay.

29Jutsa rurayllachö mana kawanäpä yanapaykallämay.

Kuyapämar leynikikunata tantiyaykatsillämay.

30Munanqaykinö kawaytam munä.

Ninqaykikunata cäsurmi kawashä.

31 Tayta Dios, mandanqaykikunatam qoyay qoyay cäsü.

Penqakuyman ama churaykallämaytsu.

32Allikunata yarpätsimaptikim shonqü pasaypa kushikun.

Tsaymi mandamientuykikunata imaypis cäsushä.

He

33 Tayta Dios, estatütuykikunata yachaykatsillämay.

Yachatsimaptikiqa wanunqäyaqmi cumplishä.

34Leynikikunata cäsunäpä tantiyaykatsillämay.

Tsaynöpam llapan shonqüwan cumplishä.

35Mandamientuykikunata cumplinäpä yanapaykallämay.

Cumplirmi kushishqa kawashä.

36Mandanqaykikunata ruranäpä yarpaykatsillämay.

Ama munaykullaytsu suwakuypa rïcuyänäta.

37Ama permitiykullaytsu mana allikunata rikanäpä.

Ninqaykinö alli kawanäpä yanapaykallämay.

38Sirviqnikikunata awninqaykita cumpliykullay.

Qamta mantsapakuq runa kaykaptïqa yanapaykallämay.

39Ninqaykikunaqa allim.

Qamta cäsunqäpita asipäyämaptin yanapaykallämay.

40Yachatsikuynikitaqa llapan shonqüwanmi kuyä.

Munanqaykinö kawanäpä yanapaykallämay.

Vav

41 Tayta Dios, kuyapäkuq kaynikiwan yanapaykallämay.

Awnimanqaykinölla salvaykallämay.

42Yanapamanqaykita rikarmi achäquita ashipämaqkuna upällakuyanqa.

Noqaqa palabraykimanmi imaypis yärakü.

43Palabraykita imaypis willakunäpä yanapaykallämay.

Ninqaykikunamanmi yärakü.

44Leynikikunata cäsurmi imaypis kawashä.

45Yachatsikuynikikunata cumplirmi imaypis tranquïlu kawashä.

46Mandanqaykikunatam reykunatapis yachatsishä.

Yachatsir manam pipitapis penqakushätsu.

47Mandamientuykikunataqa kuyämi.

Cumpliptïmi shonqü kushikun.

48Mandamientuykikunata kuyarmi kushishqa chaskï.

Estatütuykikunata cumplinäpämi imaypis yarpachakü.

Zayin

49Sirviqniki kaptï awnimanqaykita yarpaykullay.

Noqaqa qammanmi yärakamü.

50Awnimanqaykikunam imaypis animatsiman.

Llakishqa kaykaptïmi consulaman.

51Yachaq tukuq runakunam abusaykäyäman.

Abusayämaptinpis leynikikunataqa manam imaypis dëjashätsu.

52 Tayta Dios, yarparaykämi unay castäkunata ninqaykita.

Tsaykunata yarparmi imaypis kushikü.

53Mana alli ruraq runakunam pasaypa rabyanätsiyäman.

Leynikikunatapis manam cäsuyantsu.

54Karu markachö karpis estatütuykikuna alli kanqanpitam cantukunatapis cantä.

55 Tayta Dios, paqaspapis qampämi yarparä.

Imaykanöpapis leynikikuna ninqantam cäsushä.

56Imaypis yachatsikuynikikunatam cäsushä.

Jet

57 Tayta Dios, qamllam herenciä kanki.

Palabraykita imaypis cäsunäpämi awnï.

58Llapan shonqüwanmi qamta mañakamü.

Awninqaykita cumplir yanapaykallämay.

59Imanö kawanqätam yarpachakurqü.

Tantiyakurqümi mandanqaykikuna ninqannö kawanäpä.

60Imanöpapis mandamientuykikunatam cumpliyta munä.

61Mana alli runakuna imaykanöpa abusayämaptinpis leynikikunatam mana qonqaypa cäsü.

62Pullan paqas shärikuskirmi ninqaykikunata yarpaskir agradëcikü.

63Llapan mantsapakushuqnikipa amïgunmi kä.

Paykunaqa munanqaykinömi kawayan.

64 Tayta Dios, kay patsachö kuyakuynikita maytsaychömi rikä.

Estatütuykikunata yachaykatsillämay.Tet

65 Tayta Dios, palabraykichö awnimanqaykinöllam sirviqniki kaptï alli rikaykämanki.

66Yachaq y alli yarpayyuq kanäpä yanapaykallämay.

Mandamientuykikunamanmi yärakü.

67Unayqa jutsa rurayllachö kawarmi pasaypa ñakarqä.

Peru kananmi sïqa palabraykita cäsur allina kawä.

68Qamqa kuyapäkuq y allillata ruraqmi kanki.

Estatütuykikunata yachaykatsillämay.

69Yachaq tukuqkuna manakaqta tumpayämaptinpis noqaqa llapan shonqüwanmi yachatsikuynikita cäsü.

70Mana alli ruraq runakunaqa llutantam yarpäyan.

Noqaqa leynikikunata cumplirmi kushikü.

71Ñakarpis allipämi ñakarqü.

Tsaynöparämi estatütuykikunata cäsunäpä tantiyarqü.

72Noqapäqa waranqa waranqa qellaypita y qoripitapis leynikikunam mas välin.

Yod

73Kikikim makikiwan ruramar kamamarqayki.

Mandamientuykikunata yachakunäpä tantiyaykatsillämay.

74Palabraykiman yärakuptïmi mantsapakushuqnikikuna noqawan tinkur kushikuyan.

75 Tayta Dios, ninqaykikuna alli kanqantam musyä.

Llutankunata ruraptï allipämi corrigimanki.

76Llakikuptï kuyapämar kushiykatsillämay.

Awnimanqaykinölla yanapaykallämay.

77Kuyapäkuq kaynikiwan alli kawayta qaraykallämay.

Leynikikunata cumplirmi kushikü.

78Yachaq tukuqkunaqa penqakuychö kaykuyällätsun.

Paykunaqa manakaqkunatam tumpayäman.

Noqaqa yachatsikuynikitam yarparaykä.

79Mantsapakushuqnikikuna y mandanqaykikunata yachaqkuna noqawan qorikäyätsun.

80Llapan shonqüwan estatütuykikunata cäsunäpä yanapaykallämay.

Cäsukurqa manam ni imapitapis penqakushätsu.

Caf

81Salvamänaykipä shuyaraykarmi vïdätapis cäsi oqrarqü.

Imanö karpis palabraykimanmi imaypis yärakü.

82Awnimanqaykita shuyaraptïmi ñawïpis tsakaskinna.

Llakikur rugakurmi nï: <<¡Imayrä shamunki consulamänaykipä!>>

83Qoshniwan yanayashqa uyllunömi pasaypa rukuna kä.

Tsaynö karpis manam estatütuykikunataqa qonqätsu.

84¡Imayyaqrä tsaynö ñakar kawashä!

¡Imayrä conträkunata castiganki!

85Leynikikunata mana cäsuqkuna y yachaq tukuqkunam trampata churapayämashqa.

86Llapan mandamientuykikunaqa rasun kaqllam.

Imatapis mana nikaptïmi conträkunaqa qatikachäyäman.

Tayta Dios, yanapaykallämay.

87Ichikllapam wanutsiyämashqatsu.

Tsaynö kaptinpis mana qonqaypam yachatsikuynikita cäsü.

88Kuyapäkuq kaynikiwan wanuypita salvaykallämay.

Mandanqaykikunataqa imaypis cumplishämi.

Lámed

89 Tayta Dios, palabraykiqa imaypis mana ushakaqmi.

Ciëluchöpis mana ushakaqmi.

90Awninqaykitaqa imaypis cumplinkim.

Kay patsatapis mana kuyukuq kananpämi kamarqayki.

91Mandaptikim kay patsa kananyaqpis kaykan.

Llapan kamanqaykipis podernikichömi kaykan.

92Leynikikunata cäsurmi kushikü.

Mana cäsurqa llakikuyllawanmi wanuküman karqan.

93Manam imaypis yachatsikuynikita qonqashätsu.

Tsaykunata cäsurmi alli kawaykä.

94Wamrayki kaykaptïqa salvaykallämay.

Yachatsikuynikitam imaypis cumplï.

95Mana alli runakunam wanutsiyämänanpä shuyaraykäyäman.

Tsaynö kaptinpis mandanqaykikunatam cäsü.

96Llapanpis ushakaqlla kanqantam rikarqü.

Peru mandamientuykikunam sïqa imaypis ushakantsu.

Mem

97Llapan shonqüwanmi leynikikunata kuyä.

Tsaykunapämi imay hörapis yarparaykä.

98Mandamientuykikunataqa imaypis yarparaykämi.

Tsaymi chikimaqnïkunapitapis mas yachaq kä.

99Mandanqaykikunaman yarpararmi yachatsimaqnïkunapitapis mas yachaq kä.

100Yachatsikuynikikunata cäsurmi yachaq rukukunapitapis mas yachä.

101Palabraykita cäsurmi jutsa ruraykunapita witikurqü.

102Ninqaykikunatam mana qonqaypa cumpliykä.

Cumplinäpämi kikiki yachatsimarquyki.

103Palabraykiqa pasaypam mishkin.

Abëjapa mishkinpitapis masmi mishkin.

104Yachatsikuynikita yachakurmi mas yachaq kä.

Tsaymi llutan ruraykunapita witikurqü.

Nun

105Palabraykiqa aktsinömi.

Maypa aywaptïpis aktsipämaqnömi.

106Jurarmi awnirqü ninqaykikunata cäsunäpä.

Awninqätaqa imaypis cumplishämi.

107 Tayta Dios, pasaypam ñakaykä.

Palabraykichö ninqaykinölla alli kawanäpä yanapaykallämay.

108 Tayta Dios, qamta alabanqäta chaskiykallämay.

Ninqaykikunata tantiyaykatsillämay.

109Conträkunam imaypis wanutsimayta munayan.

Tsaynö kaptinpis leynikikunataqa manam qonqätsu.

110Mana cäsushuqniki runakunam trampata churapaykäman.

Tsaynö kaptinpis yachatsikuynikita manam ni imaypis dëjashätsu.

111Mandanqaykikunatam herenciatanö chaskirqü.

Tsaymi shonqüpis pasaypa kushikun.

112Llapan shonqüwanmi estatütuykikunata cumpliyta munä.

Wanunqäyaqmi imaypis cäsushä.

Sámej

113Allish tukuqkunataqa pasaypam chikï.

Peru leynikikunatam sïqa kuyä.

114Qammi pakakunä y tsapämaqnï escüdü kanki.

Awnimanqaykimanmi imaypis yärakü.

115Mana alli runakuna, noqapita witikuyay.

Noqaqa Diosnïpa mandamientunkunatam cumplishä.

116Alli kawanäpä awnimanqaykinö yanapaykallämay.

Manakaqllapäqa ama yärakatsimaytsu.

117Yanapamaptikiqa chikimaqnïkunapa poderninpitam salvakushä.

Estatütuykikunatam imaypis cumplishä.

118Estatütuykikunata mana cäsuqkunataqa manam rikaytapis munankitsu.

Llutanta rurayänallanpämi paykunaqa yarpachakuyan.

119Mana alli runakunataqa imayka qanratanömi melananki.

Noqaqa mandanqaykikunatam kuyä.

120Qamta mantsapakurmi pasaypa tsuktsukyaykä.

Tsaymi ninqaykikunata cäsukü.

Ayin

121Ninqaykikunataqa imaypis cumplïmi.

Ñakatsimaqkunapa poderninpita jipiykallämay.

122Alli kawanäpä yanapaykallämay.

Yachaq tukuq runakuna mana ñakatsiyämänanpä tsapaykallämay.

123Salvamänaykipä shuyaraykaptïmi ñawïpis tsakaskinna.

Awnimanqaykita cumplinaykipä kanqantam shuyaraykä.

124Kuyakuq kanqaykinö yanapaykallämay.

Sirviqniki karmi rugakamü estatütuykikunata yachatsimänaykipä.

125Qamta sirviqnikim kallä.

Mandanqaykikunata shumaq tantiyanäpä yachayta qaraykallämay.

126 Tayta Dios, runakunaqa leynikikunata manam cäsuyantsu.

Tsay runakunataqa ras castigaykullay.

127Fïnu qorita kuyayanqanpitapis masmi mandamientuykikunata kuyä.

128Tsaymi llapan yachatsikuynikita cäsü.

Llutankunataqa manam rurayta munätsu.

Pe

129Pasaypa kushikuypämi mandanqaykikuna.

Tsaymi imaykanöpapis cäsü.

130Palabraykita yachatsiyaptinmi runakunapa shonqunkuna atsikyan.

Humildi runapis rasmi tantiyakun.

131Llapan shonqüwanmi mandamientuykikunata yachakuyta munä.

132Kuyashuqnikikunata imaypis kuyanqaykinölla noqatapis kuyapämar yanapaykallämay.

133Awninqaykita cumplir alli kawanäpä yanapaykallämay.

Jutsa ruray vincimänanta ama permitiykullaytsu.

134Runakuna ñakatsiyämaptin salvaykallämay.

Imaykanöpapis yachatsikuynikikunatam cäsuyta munä.

135Kuyakuq kaynikiwan alli rikaykallämay.

Estatütuykikunatapis yachaykatsillämay.

136Leynikikunata mana cäsuyaptinmi pasaypa llakikur waqä.

Tsade

137 Tayta Dios, rasun kaqllatam qamqa juzganki.

Ninqaykikunapis allim kaykan.

138Mandanqaykikuna llapanpis alli karmi yärakuypä kaykan.

139Chikimaqnïkuna palabraykita mana cäsuyaptinmi pasaypa rabyanä.

140Yapay yapaymi awninqaykikunata cumplirqayki.

Awninqaykikunataqa llapantam kuyä.

141Manakaqman churayämaptinpis yachatsikuynikitaqa manam imaypis qonqashätsu.

142Qamqa rasun kaqllatam juzganki.

Leynikikunapis rasun kaqllam.

143Alläpa llakikur ima ruraytapis mana puëdiptïmi mandamientuykikuna kushikatsiman.

144Mandanqaykikunaqa imaypis allim.

Alli kawanäpä shumaq tantiyaykatsillämay.

Qof

145 Tayta Dios, llapan shonqüwanmi qamta mañakü.

Estatütuykikunata cäsunäpä yanapaykallämay.

146Qamtam mañakü salvamänaykipä.

Mandanqaykikunata imaykanöpapis cumplishämi.

147Tsaka tsakalla shärikuskirmi yanapamänaykipä mañakamü.

Palabraykimanmi yärakü.

148Awninqaykita yarpaskirmi kushishqa warärïpis.

149 Tayta Dios, kuyakuq kaynikiwan yanapaykallämay.

Imaypis alli ruraq kanqaykinö alli kawayta qaraykallämay.

150Chikimaqnïkunaqa cercächönam kaykäyan.

Paykunaqa leynikikunata manam cäsuyantsu.

151 Tayta Dios, qamqa ñöpächömi imaypis kaykanki.

Mandamientuykikunaqa llapanpis rasun kaqllam.

152Unaypitam mandanqaykikunata musyä.

Mandanqaykikunaqa imayyaqpis kaykanqam.

Resh

153Ñakaypita salvaykallämay.

Leynikikunataqa manam imaypis qonqätsu.

154Janä shärir salvaykallämay.

Awninqaykita cumplir alli kawanäpä yanapaykallämay.

155Estatütuykikunata mana cäsuyaptinmi jutsa ruraqkunata yanapankitsu.

156 Tayta Dios, pasaypa kuyapäkuqmi kanki.

Munanqaykinö kawanäpä yanapaykallämay.

157Conträkuna y chikimaqnïkunaqa atskaqmi kayan.

Peru noqaqa mandanqaykikunatam imaypis cäsü.

158Conträkunata rikaptïmi shonqüpis pasaypa rabyan.

Paykunaqa palabraykita manam cäsuyantsu.

159 Tayta Dios, yachatsikuynikitam pasaypa kuyä.

Kuyakuq kaynikiwan alli kawanäpä yanapaykallämay.

160Palabraykiqa llapanpis rasun kaqllam.

Ninqaykikunaqa imayyaqpis kaykanqam.

Sin/Shin

161Imatapis mana ruraykaptïmi poderyuq runakuna conträ shäriyan.

Tsaynö kaptinpis palabraykitam cäsü.

162Awnimanqaykikunata musyarmi alläpa kushikü.

Atska qellayta tarikuqnömi pasaypa kushikü.

163Llullakuytaqa manam imaypis munätsu.

Leynikikunataqa pasaypam kuyä.

164Ninqaykikuna allita ruranäpä tantiyatsimaptinmi imay hörapis qamta alabä.

165Leynikikunata kuyaqkunaqa kushishqam kawayan.

Paykunataqa manam ni pipis jutsa rurayman ishkitsintsu.

166 Tayta Dios, salvamänaykipämi shuyaraykä.

Tsaymi mandamientuykikunata cäsur kawaykä.

167Llapan shonqüwanmi mandanqaykikunata cäsü.

Tsaykunataqa pasaypam kuyä.

168Imanö kawanqätapis musyaykankim.

Yachatsikuynikita y mandanqaykikunata cäsurmi kawaykä.

Tav

169 Tayta Dios, mañakamunqäta awniykallämay.

Palabraykichö ninqaykinölla tantiyaykatsillämay.

170Rugakunqäta chaskiykallämay.

Awninqaykita cumplir libraykallämay.

171Estatütuykikunata yachatsimaptikim kushikur qamta alabä.

172Llapan mandamientuykikunam alli kawanäpä kaykan.

Palabraykita cantarmi llapan shonqüwan alabashayki.

173Yachatsikuynikita cäsunäpä kaykaptïqa shamur yanapaykallämay.

174 Tayta Dios, imayka desgraciapitapis salvaykallämay.

Leynikikunata cäsurmi kushikü.

175Kawanqäyaqmi qamllata alabashayki.

Ninqaykikunata tantiyatsimar yanapaykallämay.

176Ima ruraytapis mana puëdirmi oqrakashqa üshanö kaykä.

Tsaynö karpis mandamientuykikunataqa mana qonqaypam cumpliykä.

Sirviqniki kanqä raykur shamur yanapaykallämay.