Salmo 84 - Bible in Quechua of South Conchucos（qxo）

Salmo 84 (83)Tayta Diospa templunchö kayta munanqan 1 (1) Cantaqkunapa mandaqninpämi. Üvata jarur cantayanqayki tönuwan kay salmuta cantayanki. Corépita miraqkuna qellqayanqan salmu.

1 1 (2) Llapanta mandaq Tayta Dios, alläpa kuyayllapämi täkunayki templu.

2 2 (3) Imaykanöpam templupa patiunchö kayta munä.

Llapan shonqüwanmi imayyaqpis kawaq Diosta kushishqa alabä.

3 3 (4) Altarnikikuna lädunchömi pichuychankapis y wayanïtupis qeshunkunata rurayan.

Tsaychömi pushapankunatapis shakshatsiyan.

Qammi kanki llapanta mandaq Tayta Dios, mandamaqnï rey y Diosnillä.

4 4 (5) Wayikichö täraqkunam alläpa kushikuyan.

Paykunam imaypis alabayäshunki. Selah

5 5 (6) Kushishqam kaykan yanapanqayki runa.

Paymi llapan shonqunwan templuykiman aywayta munan.

6 6 (7) Waqay Raqrapa päsaptinpis tamya tiempuchönömi tsaki pukyukuna pashtamunqa.

7 7 (8) Ima päsaptinpis kallpan manam ushakanqatsu.

Siónman chaykurnam llapanpä poderyuq Tayta Diospa puntanman yaykunqa.

8 8 (9) Llapanta mandaq Tayta Dios, mañakamunqäta wiyaykallämay.

Jacob yärakunqan Tayta Dios, rugakamunqäta chaskiykallämay. Selah

9 9 (10) Tayta Dios, akranqayki reyta yanapaykullay.

Payqa tsapakunä escüdunömi.

10 10 (11) Waranqa (1,000) junaq juklächö qoyänäpa rantin mas allim kanman juk junaqllapis wayikichö qoyaptï.

Jutsasapakunapa wayinchö qoyänäpa rantin mas allim kanman wayikipa punkullanchöpis kaptï.

11 11 (12) Tayta Diosmi kawayta qaramantsik y escüdunö tsapämantsik.

Paymi kuyamantsik y alliman churamantsik.

Pay munanqannö kawaqkunataqa alli kaqkunatam alistapan.

12 12 (13) Llapanta mandaq Tayta Dios, qamman yärakamuq runaqa kushishqam kawan.