Jonás 2 - Bible in Quechua of South Conchucos（qxo）

Tayta Diosta Jonás mañakunqan

1 1 (2) Pescädupa pachanchö kaykarmi Tayta Diosta mañakur Jonás nirqan:

2 2 (3) < pasaypa llakikur mañakamuptïmi wiyamarquyki.

Wanunäpä kaykar qayakuptïmi salvamarquyki.

3 3 (4) Lamarman jitarpamaptikim pasaypa ruriman charqä.

Lamar yaku laqchikachar shamuqpis janäpam päsarqan.

4 4 (5) Ñöpaykipita qarqamanqaykitam yarparqä.

Tsaynöllam yarparqä sagrädu templuykiman manana yaykunäpä kanqanta.

5 5 (6) Yaku pasaypa tsaparämaptinmi lamar rurinchö karqä.

Yaku rurinchö qewa wiñamuqpis umämanmi awrikarqan.

6 6 (7) Pasaypa ruriyaqmi charqä.

Mananam yarqamunäpä kanqanta yarparqänatsu.

Tayta Diosllä, wanunäpä kaykaptïmi salvamarquyki.

7 7 (8) Tayta Dios, wanunaykarnam qamman mañakamurqä.

Mañakamunqätam santu templuykipita wiyamarquyki.

8 8 (9) Ïdulukunata adoraqkunaqa Diospa kuyakuyninta wasqipäyanmi.

9 9 (10) Peru noqam sïqa llapan shonqüwan agradëcikur sacrificiukunata qampä rupatsishä.

Qamta awninqätaqa llapantam cumplishä.

Qamllam poderösu kanki pitapis salvanaykipä>>.

10 10 (11) Tsaymi Tayta Dios mandaptin Jonásta lamar kuchunman pescädu lanzaramurqan.