Isaías 11 - Bible in Quechua of South Conchucos（qxo）

Davidpita miraq runa mandamaqnintsik kananpä ninqan

1Troncunpita tseqllimuqnömi mandamaqnintsik yurinqa.

Payqa Isaípita miraqmi kanqa.

2 Tayta Diospa Espïritunmi paychö kanqa.

Tsaymi tantiyakuq y yachaq kanqa,

yätsikuq y poderösu kanqa,

musyaq y Tayta Diosta mantsapakuq kanqa.

3 Tayta Diosta mantsapakurmi pay munanqannölla kawanqa.

Payqa manam pitapis rikayllanpitatsu juzganqa.

Tsaynölla manam ninshi ninshillawantsu pitapis jutsayuq kanqanta ninqa.

4Pïninpis mana kaqkunapam janan shärinqa.

Pobrikunatapis entëru nacionnintsikchömi respitatsinqa.

Parlanqanwanmi runakuna wanuyanqa.

Mana alli ruraq runakunatapis juk pükayllam ushakätsinqa.

5Tseqllanta chachak watarkurmi Tayta Dios munanqannölla imaypis mandar rasun kaqllata ruranqa.

6Tsay witsanqa atuqwan üshapis juntum puriyanqa.

Tigriwan kapishpis juntum punuyanqa.

Becërruwan leonpis tranquïlum puriyanqa.

Tsaykunataqa wamrallam mitsinqapis.

7Wäkapis ösuwan juntum qewata mikuyanqa.

Wawankunapis juntum punuyanqa.

Leonpis törunömi qewata mikunqa.

8Cobra ninqan culebrapa qeshun jananchömi chuchuykaq wamrapis pukllanqa.

Tsayrä wasqishqa wamra culebrapa qeshunman makinta jatiptinpis manam imananqatsu.

9Tayta Dios mandanqan sagrädu jirkanchöqa mananam pipis llutankunata ruranqanatsu ni pitapis ñakatsiyanqanatsu.

Lamarchö yaku junta kanqannömi Tayta Diosta reqiqkunapis kay patsachö junta kayanqa.

10Tsay witsanmi Isaípita miraq runata Tayta Dios churanqa llapan nación runakunata mandananpä.

Payta reqiyänanpämi maytsay marka runakuna aywayta munayanqa.

Pay täranqan nacionpämi pïmaypis parlayanqa.

Juklä nacionpita Israel runakunata kutitsimunanpä ninqan

11Tsay witsanmi juklä nacionkunachö mashtakashqa kaykäyanqanpita kuyanqan runakunata Tayta Dios yapay qorimunqa.

Paymi kutitsimunqa Asiriapita, Egiptupita, Patruspita, Etiopíapita, Elampita, Sinarpita, Hamatpita y lamar kuchunchö kaq nacionkunapitapis.

12Maytsay nacionkunapitapis Israel runakuna kutiyämunanpämi bandërata jawiyanqa.

Maytsaychö mashtakashqa kaykaqtam Judá runakunatapis qorimunqa.

13Nacionninkunaman kutiykur Efraín runakuna mananam Judá runakunawan chikinakuyanqanatsu.

Judá runakunata chikiqkuna llapanmi ushakäyanqa.

Judá runakunapis manam Efraín runakunata chikiyanqanatsu.

14Tsaypa rantinqa Judá runakunapis Efraín runakunapis qorikaskirmi rupay ullunan läduchö kaykaq Filistea nacionta atacayanqa.

Rupay yarqamunan läduchö täraqkunata vinciskirmi imaykantapis apakuyanqa.

Edom nacionpis y Moab nacionpis paykunapa poderninkunachömi kayanqa.

Amón nación runakunapis paykuna niyanqantam rurayanqa.

15Nacionninman kutiyämunanpämi Puka Lamarta päsayänanpäpis Tayta Dios nänita kichapunqa.

Éufrates mayuta päsayänanpämi tsay mayu jananpa makinta joqarinqa.

Makinta joqarkur pasaypa vientutsimurmi tsay mayuta qanchisman rakirinqa.

Tsaypam runakuna llanqinkunatapis mana jipiypa päsayanqa

16Asiriachö täraq Israel runakunapis jatun nänipam kutiyämunqa.

Egiptupita yarqamur jatun nänipa shayämunqannömi kutiyämunqa.