1 1 (1b) Tayta Diostam llapan shonqüwan alabashä.
Llapan voluntänïwanmi santu jutinchö agradëcikushä.
2 Tayta Diostam llapan shonqüwan alabashä.
Kuyapämar yanapamanqantaqa manam ni imaypis qonqäshätsu.
3Paymi llapan jutsäpita perdonaman.
Imaykaläya qeshyapitam allïtsiman.
4Wanuypitapis paymi salvaman.
Kuyapämarmi imaykachöpis yanapaman.
5Alli kaqkunatam alistapäman.
Ankanö kallpayuq kanäpämi jövinyätsiman.
6Pobrikunata sufritsiyaptinmi Tayta Dios janan shärin.
7Imanö kawanapäpis Moiséstam musyatsirqan.
Ruranqankunatam Israel runakunata tantiyatsirqan.
8 Tayta Diosqa alli shonqu y kuyapäkuqmi.
Kuyakuq karmi rasllaqa rabyakuntsu.
9Manam yapay yapaytsu castigamantsik.
Manam imayyaqpis rabyashqatsu kanqa.
10Manam jutsata ruranqantsikmantsu castigamantsik.
11Kay patsapita ciëlu pasaypa altu kanqannömi payta mantsapakuqkunapäqa kuyakuynin jatun kaykan.
12Patsapa jukaq kuchunpita jukaq kuchunyaq jitaqnömi jutsantsiktapis karuman jitashqa.
13Wamranta papänin kuyanqannömi payta mantsapakuqkunata kuyan.
14Imanö kanqantsiktapis musyanmi.
Allpallapita kanqantsiktam musyan.
15Runakunaqa qewanö ushakaqllam kayan.
Waytanö shushuqllam kayan.
16Achaq vientu shamurmi jachata ushakätsin.
Maychö kanqanpis manam musyakantsu.
17Peru Tayta Diospa kuyakuyninmi sïqa mana ushakaq.
Payta mantsapakuqkunatam imaypis kuyan.
Paykunapa tsurinkunapä y willkankunapäpis allikunallatam ruran.
18Tsaynöllam yanapan ruranqan pactuta cumpliqkunata y mandamientunkunata cäsuqkunata.
19Ciëluchömi Tayta Diospa trönun.
Tsaypitam llapan kay patsachö kaqkunata mandaykan.
20Poderösu angelkuna, Tayta Diosta alabayay.
Ninqanta cäsuqkuna kar payta alabayay.
21 Tayta Diosta sirviq y munanqanta ruraq angelkuna, payta alabayay.
22Llapan kamanqankuna, maytsaychöpis payta alabayay.
Paytam llapan shonqüwan noqapis alabashä.
Who We AreWhat We EelieveWhat We Do
2025 by iamachristian.org,Inc All rights reserved.
