1Hïju, yachatsinqäkunata ama qonqankitsu.
Mandamientükunata mana qonqaypa yarparanki.
2Yarpararqa atska watam kushishqa kawanki.
3Imaypis ama qonqankitsu kuyakuq kayta y rasun kaqta parlayta.
Mana qonqanaykipä tsaykunata wallqakuy.
Imaypis yarparänaykipä shonquykiman qellqay.
4Tsaynöpam Tayta Diospis y runakunapis alli rikayäshunki.
5Llapan shonquykiwan Tayta Diosman yärakuy.
Yachaq kanqaykimanqa ama yärakuytsu.
6Imata ruranaykipäpis Tayta Dios munanqannö ruranaykipä yarpachakuy.
Tsaynö kawaptikiqa paymi yanapashunki.
7Ama alläpa yachaq tukuytsu.
Tsaypa rantinqa Tayta Diosta mantsapakur llutan ruraykunata dëjay.
8Tsaynö rurarqa sänum kawanki y tulluykikunapis ankashmi kanqa.
9 Tayta Diosta adorar imaykipis kanqanpita y chakraykichö punta poquqpita ofrendata apay.
10Tsaynö apaptikim wayikimanpis kichkinqanyaq mikuynikikuna kanqa.
Üvata tsaytsikata qoriptikim uylluykikunapita vïnupis püsinqarä.
11Hïju, Tayta Dios corrigishuptiki ama qallayaytsu.
Qallayänaykipa rantin cäsukuy.
12Kuyay tsurinta papänin corriginqannömi Tayta Diospis kuyanqan kaqta corrigin.
13Kushishqam kawanqa yachaq y alli yarpayyuq runaqa.
14Yachaq kayqa qellaypitapis y qoripitapis mas allim.
15Kuyayllapä rumikunapitapis masmi välin.
Yachaymanqa manam imayka munanqaykipis iwalantsu.
16Yachayqa derëcha kaq makinwanmi atska wata kawanaykipä yanapashunki.
Itsuq kaq makinwannam rïcuyätsishunki y pïmaypitapis alli rikashqa kanaykipä yanapashunki.
17Tsaynöpam piwanpis mana rimanakuypa kushishqa kawanki.
18Yachaq karmi atska wata kushishqa kawanki.
19 Tayta Diosmi yachayninwan kay patsatapis ciëlutapis kamarqan.
20Yachayninwanmi qochakuna y mayukuna kananpä yakutapis pashtatsimurqan.
Tsaynöllam tamyamunanpä pukutaytapis kamarqan.
21Hïju, yachaq kayta imaypis ama qonqaytsu.
Shumaq yarpachakuskir imatapis ruray.
22Yachaq kaynikiwanmi alli kawanki.
Runakunapis respitayäshurnikim alli kanqaykita parlayanqa.
23Yachaq karmi mana mantsariypa kawanki.
Jutsa ruraymanpis manam ishkinkitsu.
24Tsaynöllam mana mantsariypa imapäpis mana yarpachakur pununki.
25Mana alli ruraq runakunata illaqpita desgracia päsaptinpis qamtaqa manam päsashunkitsu.
26Tsaynö kawanaykipäqa Tayta Diosmi imaypis yanapashunki.
Paymi ima ñakaypitapis tsapäshunki.
27Yanapayta puëdiykarqa faltapakuqta ras yanapanki.
28Kaykäpushuptikiqa runa mayikita ama <
29Runa mayiki yärakuykäshuptikiqa contran shärinaykipä ama yarpaytsu.
30Achäquita mana ashipaykäshuptikiqa piwanpis ama rimanakuytsu.
31Mana alli ruraq runakuna rïcuyäyaptin ama envidiaytsu.
Mana allita rurayaptinpis qamqa ama ruraytsu.
32 Tayta Diosqa mana alli ruraq runakunata rikaytapis manam munantsu.
Alli ruraq runakunatam sïqa kuyan.
33Llutan ruraq runakunataqa castantintam Tayta Dios maldicionan.
Peru alli ruraq runakunatam sïqa castantinta bendicionninta qaran.
34Runa mayinta manakaqman churaqkunataqa kikintam Tayta Dios manakaqman churan.
Peru humildi kaqkunatam sïqa kuyapar yanapan.
35Yachaq runakunataqa pïmaypis respitayanmi.
Peru mana yachaq runakunatam sïqa pipis respitantsu.
Who We AreWhat We EelieveWhat We Do
2025 by iamachristian.org,Inc All rights reserved.
