Proverbios 28 - Bible in Quechua of South Conchucos（qxo）

1Jutsa ruraq runaqa pipis mana qatikachaykaptinmi qeshpir aywakun.

Peru alli ruraq runam sïqa imayka leonnö imatapis mantsantsu.

2May nacionchöpis mana alli kawayaptinqa atska autoridätarämi nisitayan.

Autoridä yachaq karqa llapantapis sitiunmanmi churan.

3Pobrikunata ñakatsiq mana alli ruraq runaqa poqushqa mikuyta teqi apaqnömi kaykan.

4Leyta mana cäsuq runaqa mana alli ruraq runatam alaban.

Peru leyta cumpliq runam sïqa mana alli ruraq runata cäsuntsu.

5Mana alli runakunaqa allita rurayänanpä kaqta manam tantiyayantsu.

Tayta Diosta ashiqkunam sïqa alli kaqkunata rurayänanpä tantiyakuyan.

6Rïcu kaykar engañakuq kanqanpitaqa mas allim kanman pobri karpis mana engañakuq kanqan.

7Tayta Diospa leyninkunata cäsuq runaqa tantiyakuqmi kaykan.

Alläpa mikuq runakunawan puriq runaqa papänintam penqakuyman churan.

8Qellayninpa wachayninwan rïcuyaq runaqa manam tsay qellayta probichanqatsu.

Tsaypa rantinqa pobrikunata kuyapaq runam probichanqa.

9Tayta Diospa leyninkunata mana cäsukuq runataqa mañakunqantapis Tayta Dios manam chaskinqatsu.

10Jutsata rurananpä yätsikuq runaqa kikinpis jutsa ruraymanmi chanqa.

Jutsata mana rurananpä tantiyatsiq runam sïqa alli kawayman chanqa.

11Rïcu runaqa yachaq kanqantam yarpan.

Pobri karpis yachaq runam sïqa tsay rïcu runa imanö kanqantapis musyan.

12Alli ruraq runa gänaptinqa pïmaypis kushikurmi fiestata rurayan.

Peru mana alli ruraq runa gänaptinmi sïqa pïmaypis mantsarir pakakuyan.

13Jutsa ruranqanta mana reconöciptinqa manam ima ruranqanpis allitsu kanqa.

Peru jutsa ruranqanta reconöcir dëjaptinmi sïqa Tayta Dios perdonanqa.

14Tayta Diosta imaypis mantsapakuq runaqa kushishqam kawan.

Peru mana cäsukuq runam sïqa ñakayman chanqa.

15Imayka mallaqashqa ösunö o mallaqashqa leonnömi mana alli ruraq autoridäqa muchuqkunata ñakatsin.

16Mana tantiyakuq autoridäqa mandanqan runakunatapis mana kuyapaypam ñakatsin.

Mana suwakuq autoridämi sïqa atska wata kawanqa.

17Wanutsikuq runaqa qeshpi qeshpillam wanunqanyaqpis purinqa.

Tsay runapa favornin ama pipis shäritsuntsu.

18Alli runaqa ima desgraciapitapis salvakunmi.

Peru mana alli ruraq runam sïqa desgraciaman chanqa.

19Arukuq runapaqa mikuyninpis atskam.

Peru qela runakunawan qorikaq runapam sïqa mikunanpäpis kantsu.

20Yärakuypä runaqa alabashqam kanqa.

Ras rïcuyayta munaq runaqa llutantam ruranqa.

21Juzgarqa pipapis janan mana shäriypa juzganki.

Wakin juzgaqkunaqa imatapis chaskinan raykurmi jutsa ruraqpa janan shärin.

22Mallaqashqa runaqa rïcuyayllapämi yarpachakun.

Manam musyantsu mallaqashqa kanqanpita pobriyänanpä kanqanta.

23Wakinqa mana allita ruraptiki alabashunaykipa rantinmi corrigishunki.

Corrigishuptiki qallayarpis allipä kanqantam tantiyakunki.

24Papäninta y mamanta suwapaskir <> niq runaqa wanutsikuq runapa yanapaqnin kanqannömi kaykan.

25Imaykapäpis mallaqashqa runaqa piwanpis rimanakullarmi kawan.

Tayta Diosman yärakuq runaqa imaykayuqmi kanqa.

26Kallpanman y yachaq kayninman yärakuq runaqa mana tantiyakuqmi kaykan.

Tantiyakuq runaqa imapitapis salvakunqam.

27Pobrikunata yanapaqtaqa manam imapis faltanqatsu.

Pobrikunata mana yanapaqtam sïqa pïmaypis maldicionanqa.

28Mana alli ruraq runakuna mirayaptinmi runakuna mantsariyan.

Tsay runakuna ushakäyaptinmi kushikuyan.