Proverbios 13 - Bible in Quechua of South Conchucos（qxo）

1Yachaq wamraqa papänin yätsinqantam chaskikun.

Peru malqueriädu wamram sïqa wiyakuntsu.

2Shiminpitam alli rikashqa o mana alli rikashqapis kanqa.

Peru traicionëru runam sïqa chikishqa kanqa.

3Allikunallata parlaq runaqa wanuypitam salvakun.

Peru shimin tarinqanta parlaq runam sïqa ushakan.

4Qela runaqa imata munarpis manam tarintsu.

Peru arukuq runam sïqa munanqanta imatapis tarin.

5Alli ruraq runaqa llullakuyta manam munantsu.

Mana alli ruraq runaqa penqakuypämi imatapis ruran.

6Alli ruraq runaqa allita ruranqanpitam alli kawanqa.

Peru mana alli ruraq runam sïqa jutsata ruranqanpita ushakanqa.

7Wakin runakunaqa imanpis mana kaykaptinmi rïcu tukuyan.

Wakin runakunanam imaykanpis kaykaptin pobri tukuyan.

8Rïcu runaqa qellayninwanmi wanuypitapis salvakun.

Peru pobri runatam sïqa pipis suwapunanpä yarpantsu.

9Alli kawaq runaqa shumaq atsikyaq chiwchinömi kaykan.

Peru mana alli ruraq runam sïqa aktsi upiqnö illakanqa.

10Allish tukuq runaqa pitapis ajanätsinmi.

Yätsinqanta cäsukuq runaqa yachaqmi kaykan.

11Mana ñakaypa tarinqan qellayqa yakunömi ushakan.

Wallka wallkalla qellayta qoriq runam sïqa imaykayuq tikran.

12Yarpanqannö imapis mana kaptinqa pipis pasaypam llakikun.

Peru yarpanqannö kaptinmi sïqa kushikun.

13Mandaqnin ninqanta mana cäsurqa castigashqam kanqa.

Peru mandanqanta cäsurmi sïqa premiuta chaskinqa.

14Yachaq runa yätsinqanta chaskikurqa alli kawaytam tarin.

Tsaynöpam wanuypitapis qeshpin.

15Alli yarpayyuq runataqa pïmaypis respitanmi.

Peru mana cäsukuq runam sïqa desgraciaman chan.

16Tantiyakuq runaqa shumaq yarpachakuskirmi imatapis ruran.

Peru mana tantiyakuq runam sïqa llutanta ruraykarpis gäla tukun.

17Mana yärakuypä runaqa mandaqnintam rabyanätsin.

Peru yärakuypä runam sïqa mandaqninta kushikatsin.

18Yätsinqanta mana cäsukuq runaqa penqakuypämi hambrünaman chanqa.

Peru yachatsinqanta cäsukuq runam sïqa respitashqa kanqa.

19Yarpanqannölla imapis kaptinmi pipis kushikun.

Mana tantiyakuq runaqa llutan rurayta manam jaqiyta munantsu.

20Yachaq runawan purirqa yachaqmi tikran.

Mana yachaq runawan purirmi sïqa mana allikunata yachakun.

21Mana alli ruraq runaqa imaypis problëmallachömi kawan.

Peru alli ruraq runam sïqa tranquïlu kawan.

22Alli runapa herencianqa hasta willkankunapäpis kanqam.

Peru mana alli ruraq runapa herencianmi sïqa alli runakunapa makinman chanqa.

23Pobri runapa chakranchö mikuy alli wayuptinpis mana alli runam suwapun.

24Wamranta mana corrigirqa manam rasunpatsu kuyan.

Rasunpa kuyarqa jukllam corrigin.

25Alli ruraq runapa wayinchöqa mikuynin sobray sobraymi.

Peru mana alli ruraq runapa wayinchömi sïqa vientulla tumaykan.