Salmo 26 - Bible in Quechua of South Conchucos（qxo）

Salmo 26 (25)Alli runa Tayta Diosta mañakunqan 1a (1a) David qellqanqan salmu.

1 1 (1b) Tayta Dios, jutsaynaq kanqäta conträkunata tantiyaykatsillay.

Noqaqa munanqaykinömi kawä.

Imaypis qamllamanmi yärakü.

2Imanö kawanqätapis rikaykullay.

Shonqü allita o mana allita yarpanqantapis musyaykullay.

3Kuyakuq kanqaykitaqa imaypis yarparaykämi.

Munanqaykinömi imaypis kawä.

4Llullakuqkunawanqa manam juntakarqütsu.

Allish tukuqkunawanqa manam qorikarqütsu.

5Mana alli ruraq runakuna qorikäyanqanmanqa manam aywätsu.

Llutan yarpayyuq runakunawanqa manam imaypis juntakätsu.

6Jutsaynaq karmi mayllashqanö kä.

Tsaymi altarniki ñöpanmanpis yaykü.

7Tsaychömi agradëcikur qamta alabä.

Kushikuypä ruranqaykikunatam pïmaytapis willä.

8 Tayta Dios, täkunqayki wayikitapis kuyämi.

Tsay wayikichömi poderyuq kanqaykita tantiyä.

9Jutsa ruraqtanöqa ama wanuykatsillämaytsu.

Wanutsikuqkunatanöqa ama castigaykallämaytsu.

10Paykunaqa mana allita rurayänallanpämi yarpachakuyan.

Chaskipakurmi alläpa rïcuyäyashqa.

11Noqaqa manam jutsata rurartsu kawä.

Tayta Dios, kuyapämar salvaykallämay.

12Yanapamaptikim mantsakünatsu.

Kuyanqayki runakuna qorikäyanqanchömi qamta alabashayki.