Isaías 26 - Bible in Quechua of South Conchucos（qxo）

Tayta Dios yanapanqanpita alabayanqan

1Tsay witsanmi Judá nacionchö kay cantuta cantar niyanqa:

<

Tayta Dios tsapämashqaqa ishkay murällawan tsapashqanömi kaykantsik.

2¡Alli runakuna yaykayämunanpä marka punkunta kichapäshun!

¡Tayta Dios munanqannö kawaq runakuna yaykayämutsun!

3<

Qamllapä yarparaqkunataqa mana llakikuyänanpämi imaypis tantiyatsinki.

4¡Tayta Diosllaman imaypis yärakushun!

Payqa amparakunantsik qaqam imayyaqpis kaykan.

5<

Täyanqan markatapis chipyaq juchutsirmi ushakätsin.

6Ushakätsiptinmi pobrikunapis, waktsakunapis tsay runakunata asipäyanqa.

7Peru alli runakunatam sïqa pitsashqa nänipanö puriyänanpä yanapan.

Allillata ruraq karmi tranquïlu kawayänanpä imaypis yanapan>>.

Tayta Dios salvananpä shuyäyanqan

8 Tayta Dios, mandamientuykikunata cäsurmi salvayämänaykipä shuyaykäyä.

Jutikita joqarirmi qamllata imaypis yarparaykäyä.

9Paqaspapis qamllamanmi yärakayämü.

Tsaka tsakallanam llapan shonqükunawan mañakayämü.

Runakunata castiganqaykita rikarrämi wakin runakunapis llutan ruraykunata dëjayanqa.

10Peru mana alli ruraq runakunam sïqa kuyapaptikipis mana alli rurayta dëjayanqatsu.

Alli ruraq runakunapa lädunchö taykarpis mana allillatam rurayan.

Poderösu kanqaykita musyaykarmi llutankunata rurayan.

11 Tayta Dios, castiganaykipäna kaykanqaykita tsay runakuna manam tantiyayantsu.

¡Kuyanqayki runakunapa favornin shärinqaykita rikar penqakuyätsun!

¡Chikishuqnikikunata castigar nina ushaqnörä ushaykullay!

12 Tayta Dios, kushishqa kawayänäpä qamllam yanapayämanki.

Qam permitiptikim llapan ruranqäkunapis alli kaykan.

13 Tayta Diosllä, mandaq jäpa runakunam poderninchö tsararäyämashqa.

Tsaynö kaptinpis qamllamanmi imaypis yärakayämü.

14Tsay mandaqkunata castigarmi ushakätsirquyki.

Paykunata wanutsirmi illakätsirquyki.

Tsay runakunaqa manam kawayämunqanatsu.

Paykunapä manam pipis yarpanqanatsu.

15 Tayta Dios, bendicionnikiwanmi nacionnï jatunyashqa.

Lindërunkunatam mas karuman wititsirquyki.

Tsaynö ruranqaykipitam qamta alabayä.

16 Tayta Dios, pasaypa ñakatsiyämaptikim qamta ashiyarqä.

Castigayämaptikim rugakayämurqä.

17Wachay nanaywan warmi qayaranqannömi qampa puntaykichö qayaräyarqü.

18Juklä nación runakuna ñakatsiyämaptin manam imanöpapis salvakuyta puëdiyarqütsu.

Manam alli kawaytapis tariyarqütsu.

19Tsaynö kaptinpis qamman yärakuqkunaqa kawayämunqam.

Pampayaptinpis shäriyämunqam.

¡Allpaman tikrashqa kaqkuna, shärir kushishqa cantayay!

Qamkunatapis alli kawayänaykipämi Tayta Dios yanapayäshunki.

Shullyatanömi salvacionninta mandamunqa.

20Marka mayikuna, wayikikunaman yaykur punkuykikunata wichqayämuy.

Tayta Diospa rabyaynin päsanqanyaq pakaräkuyay.

21Täkunqanpitam Tayta Dios yarqamunqa.

Kay patsachö täraqkunatam jutsankunapita castiganqa.

Runakuna pakayllapa wanutsiyanqanta kay patsapis manam upällakunqatsu.

Wanutsikuq kayanqanpitam castigashqa kayänanpä shimpinqa.