1Kay patsata pasaypa kuyutsirmi llapantapis Tayta Dios ushakätsinqa.
Runakunata wakpa kaypam qarqunqa.
2Tsay junaqmi común runapis, sacerdötipis,
patronpis, esclävupis,
patrönapis, esclävapis,
rantiqpis, rantikuqpis,
prestaqpis, prestakuq kaqpis,
rïcupis, pobripis llapan ñakayanqa.
3Kay patsata ushakätsirmi tsunyaykaqta jaqinqa.
Tsaynö kananpämi Tayta Dios nin.
4Qora tsakir ushakaqnömi kay patsapis ushakanqa.
Ciëlupis kay patsapis pasaypam llakikuyanqa.
5Tsaynö kananpäqa kay patsachö täraq runakunam jutsayuq kayan.
Paykunaqa Tayta Diospa leyninkunata ni estatütunkunatapis manam cumpliyantsu.
Imayyaqpis cäsunantsikpä pactutapis manam cumpliyantsu.
6Tsaynö kaptinmi kay patsata Tayta Dios maldicionar ushakätsinqa.
Tsaymi kay patsachö täraqkunapis ñakayanqa.
Wallkallanam kawaykar quëdayanqa.
7Üva plantakunatapis qeshyam ushanqa.
Vïnupis manam kanqanatsu.
Puntata kushishqa kawaqkunapis llakishqanam kawayanqa.
8Manam panderëtatapis tukayanqanatsu.
Fiestata manana rurayaptinmi kushikuypis kanqanatsu ni arpakunatapis tukayanqanatsu.
9Cantarnin manam vïnutapis upuyanqanatsu.
Imayka machätsikuqta upuyaptinpis pasaypam ayanqa.
10Tayta Diosta mana cäsuq runakunapa markankunam juchutsishqa kanqa.
Wayinkunaman mananam pipis yaykunqanatsu.
11Vïnu manana kaptinmi cällikunachö waqayanqa.
Llakikuyllana maytsaychöpis kaptinmi pipis kushikunqanatsu.
12Raqällatanam markata jaqiyanqa.
Marka punkukunatapis pakirmi ushayanqa.
13Wallkaqllanam kay patsachö runakuna quëdayanqa.
Olïvusta cosechar tapsiyaptin juk ishkayllana yuranchö quëdanqannömi kayanqa.
Üva cosëchachö juk ishkayllana quëdanqannömi quëdayanqa.
14Kawaykar quëdaq runakunam kushikuyanqa.
Tayta Dios imanöpis ruranqanta rikarmi rupay ullunan läduchö täraqkunapis cantayanqa.
15Rupay yarqamunan läduchö täraqkunapis Tayta Diostam alabayanqa.
Lamar kuchunchö täraqkunapis Israel runakunata kuyaq Tayta Diostam alabayanqa.
16Kay patsapa juk kuchunpita jukaq kuchunyaqmi alabayanqa.
<<¡Allillata ruraq Tayta Diosta alabashun!>> nir cantayanqanmi wiyakanqa.
¡Pasaypa llakishqam kaykä!
¡Shonqüpis nanayparämi llakikun!
¡Mana alli runakunaqa traicionërum kayan!
¡Kuyapäkuyninpis manam kantsu!
17Kay patsachö täraqkuna pasaypam mantsariyanqa.
Uchkuman y trampaman jeqaqnömi kayanqa.
18Mangäda tamyam tamyamunqa.
Kay patsata tukmaraqkunapis pasaypam tsuktsukyäyanqa.
Mantsariypä kaptinmi qeshpir aywaqkuna uchkuman jeqanqa.
Uchkupita yarquq kaqnam toqllaman yaykunqa.
19Kay patsa pasaypa mantsariypämi tsuktsukyanqa.
Tsaymi maytsaychöpis rachir ushakanqa.
20Machashqa runa tsankapaykaqnömi kayanqa.
Tsuklla ushakaqnömi ushakanqa.
Runakuna jutsata rurayanqanmi kay patsa pasaypa lasäpan.
Tsaymi atska qepiwan shäriyta mana puëdiq runanölla kay patsapis kanqa.
21Tsay junaqmi ciëluchö kaq poderyuqkunatapis Tayta Dios castiganqa.
Kay patsachö kaq reykunatapis castiganqa.
22Llapanta qoriskirmi pözuman wiñaqnö prësu wichqarätsinqa.
Tsaychö atska wata wichqararkatsirmi paykunata pasaypa castiganqa.
23Llapanta mandaq Tayta Dios Sión jirkanpita mandamuptinmi killapis penqakunqa.
Rupaypis manam atsikyanqanatsu.
Jerusalénchö chipipiykaqta y poderyuq kanqantam mayor runakunapis rikayanqa.
Who We AreWhat We EelieveWhat We Do
2025 by iamachristian.org,Inc All rights reserved.
