1 1 (1b) Tayta Dios, contrayki nación runakunam markaykiman yaykayämushqa.
Mana respitarmi sagrädu templuykimanpis yaykuyashqa.
Jerusaléntapis raqällatanam dëjayashqa.
2Sirvishuqnikikunapa ayantapis wiskurkuna y munti ashmakuna mikuyänanpämi jitariyashqa.
3Entëru Jerusalénchömi yakutanörä yawarnintapis jichayashqa.
Ayakunata pampananpä manam pipis kashqatsu.
4Tsayta musyaykurmi vecïnü nación runakunapis kushipäyämar asipäyäman.
Tsaynöllam manakaqman churayäman.
5 Tayta Dios, ¡imayyaqrä noqakunawan rabyashqa kanki!
¿Tsaynöllatsurä imayyaqpis rabyashqa kanki?
6Rabyashqa karqa contrayki nación runakunata castigaykullay.
Paykunaqa manam cäsuyäshunkitsu ni jutikichöpis manam mañakuyäshunkitsu.
7Paykunam Jacobpita miraqkunata wanutsir ushayashqa.
Kay nacionchö markakunatapis raqällatanam dëjayashqa.
8Unay castäkuna jutsata rurayanqanpita ama castigaykayällämaytsu.
Pasaypa llakishqa kaykäyanqäta rikaykarqa ras yanapaykayällämay.
9Salvakuq Tayta Dios, kuyapaykayällämay.
Jutsäkunapita perdonar salvaykayällämay.
Tsaynöpam pïmaypis tantiyayanqa awninqaykita cumpliq kanqaykita.
10Wakin nación runakunam niyan:
<<¿Maychötä Diosnin kaykan?>>
Sirvishuqnikikunata wanutsiyanqanpita paykunatapis ushakaykatsillay.
Paykunatapis castiganqaykita pïmay musyayätsun.
11Prësukuna mañakayämushunqaykita wiyaykullay.
Wanutsishqa kayänanpä kaykaqkunata podernikiwan salvaykullay.
12Tayta Dios, vecïnü nación runakuna contrayki parlayanqanpita qanchis kuti castigaykullay.
13Noqakunaqa kuyanqayki runakunam kayä.
Majädaykichö kaykaq üshaykikunam kayä.
Imaypis agradëcikuyäshaykim.
Mana dëjaypam imaypis alabayäshayki.
Who We AreWhat We EelieveWhat We Do
2025 by iamachristian.org,Inc All rights reserved.
