1 1 (1b) Tayta Diosmi aktsï y salvamaqnï.
Tsaynö kaykaptinqa ¿pitarä mantsäman?
Tayta Diosmi imapitapis tsapäman.
Tsaymi pitapis mantsätsu.
2Conträkuna atacamar wanutsiyämänanpämi qorikäyan.
Tsaynö karpis kikinkunam ushakäyanqa.
3Maytsikaq soldädukuna jirurupäyämaptinpis manam mantsarishätsu.
Wanutsiyämänanpä alistakuyaptinpis qammanmi yärakamü.
4 Tayta Diosta jukllayllatam mañakü.
Tsaytaqa pasaypam munä.
Paytam mañakü qoyay qoyay wayinchö kanäpä,
kuyakuq kanqanta shumaq tantiyanäpä
y templunchö payta adoranäpä.
5Ñakaykuna chämuptinpis paymi wayinman pakamanqa.
Tsaychömi conträkunapita tsapämanqa.
Qaqa jananman qeshpitsiqnömi qeshpitsimanqa.
6Conträkunata vincinäpämi yanapamanqa.
Tsaymi templunman aywaykur kushikuypita sacrificiukunata rupatsishä.
Tsaychömi Tayta Diosta kushishqa alabashä.
7 Tayta Dios, mañakamunqäta wiyaykallämay.
Kuyapäkuq kaynikiwan rugakamunqäta contestaykallämay.
8Llapan shonqüwanmi qamta ashï.
Imaypis qamtam ashishayki.
9Noqapita ama pakakuykullaytsu.
Rabyarpis ama jaqiykallämaytsu.
Qamllam imaypis yanapamanki.
Japallätaqa ama dëjaykallämaytsu.
Qamllam salvamaqnï kanki.
10 Tayta Dios, papänï y mamä dëjayämaptinpis qammi qorikamanki.
11 Tayta Dios, alli kawanäpä nänikita reqiykatsimay.
Conträkunapa rikananchö alli kawanäpä yanapaykallämay.
12Chikimaqnïkunapa makinchö ama jaqiykallämaytsu.
Paykunaqa conträ shärirmi imatapis manakaqkunata tumpayäman.
13Noqa musyämi Tayta Dios yanapamänanpä kanqanta.
Kay patsachö kawanqäyaqmi tsayta rikashä.
14 Tayta Diosllaman imaypis yärakuyay.
Mana ajayaypa y mana qelanaypa payllaman confiakuyay.
Who We AreWhat We EelieveWhat We Do
2025 by iamachristian.org,Inc All rights reserved.
