Salmo 105 - Bible in Quechua of South Conchucos（qxo）

Salmo 105 (104)Kuyanqan runakunata Tayta Dios alli rikanqan 1 Crónicas 16.8-22

1¡Tayta Diosta agradëcikuyay!

¡Paypa jutinchö alabayay!

Llapan ruranqanta maytsay nacionchöpis willakuyay.

2Salmukunata cantar alabayay.

Espantaypä ruranqankunata willakuyay.

3 Tayta Diosta ashiqkuna, llapan shonquykikunawan payta alabayay.

Japallan santu Dios kanqanpita kushikuyay.

4Poderösu Tayta Diosta imaypis ashiyay.

Yanapashunaykipä payta imaypis mañakuyay.

5Espantaypä ruranqan milagrukunata yarpäyay.

Contrantsikkunata imanö vincinqanta ama qonqayaytsu.

6Tayta Diosta sirviq Abrahampita miraqkuna, tsaykunata yarpäyay.

Akranqan Jacobpita miraqkuna, llapan ruranqankunata ama qonqayaytsu.

7Paymi noqantsikpa Tayta Diosnintsik.

Entëru kay patsachömi munanqanta ruran.

8 Pactu ruranqanta manam imaypis qonqantsu.

Waranqa (1,000) generación päsaptinpis yarparaykanmi.

9Tsay pactutam Abrahamwan rurarqan.

Isaactapis jurarmi awnirqan.

10Imaypis cumplinanpämi Jacobta y paypita miraq Israel runakunatapis awnirqan.

11Awnirmi nirqan:

< herenciaykikuna kananpä entregayäshayki>>.

12Tsay witsanqa Israel runakuna wallkaqllam kayarqan.

Juklä nacionchö yupashqallam kayarqan.

13Paykunam nación nación y marka marka puriyarqan.

14Tsaynö puriyaptinpis pipis ñakatsinanta Tayta Dios manam munarqantsu.

Tsaymi reykunata castigar nirqan:

15<

Profëtäkunatapis musyaskiyänanpä ¡pillapis yataskinman!>>

16Tayta Diosmi paykuna täyanqan nacionchö hambrüna kananpä permitirqan.

Tsaymi mikuyänanpä imapis karqantsu.

17Hambrünapita salvananpämi Egiptuman paykunapa puntanta Joséta mandarqan.

Esclävu kananpä wawqinkuna rantikuyaptinmi tsayman charqan.

18Egipto runakunam Josépa chakinta cadënawan watarätsiyarqan.

Kunkapitam fiërru cadënawan watarätsiyarqan.

19Tsaychömi sueñunqankuna cumplinqanyaq wichqararqan.

Tsaynöpam rasun kaqta sueñunqanta Tayta Dios runakunata tantiyatsirqan.

20Tsaypitanam tsay nacionpa mandaqnin rey carcelpita jipitsimurqan.

21Jipiskatsirmi palaciunta y llapan imaykantapis shumaq rikananpä churarqan.

22Tsaynöllam churarqan mandayiqninkunata y mayor runakunata shumaq yätsinanpä.

23Tsaypitanam Israel runakuna Egiptuman aywakuyarqan.

Tsaynöpam Cam partichö tsurinkunawan Jacob täkurqan.

24Tayta Diospa bendicionninwanmi atskaqman mirayarqan.

Egipto runakunapitapis mas atskaqmi kayarqan.

25Tsaymi Egipto runakunata Tayta Dios yarpayta qorqan Israel runakunapa contran shäriyänanpä.

Tsaynöpam Tayta Diosta sirviq runakunata ñakatsiyarqan.

26Tsaypitam Tayta Dios mandarqan sirviqnin Moisésta y akranqan Aarónta.

27Tayta Diospa poderninwanmi Cam partichö espantaypä kaqkunata rurayarqan.

28Tsaymi tsay nacionta pasaypa tsakayman tikratsirqan.

Tsaynö kaptinpis Egipto runakunaqa Moisés ninqanta manam cäsuyarqantsu.

29Yawarmanmi mayukunatapis Tayta Dios tikratsirqan.

Challwakunapis chipyaqmi wanur ushakäyarqan.

30Entëru nacionmanmi säpukuna juntayarqan.

Reypa palaciunmanpis juntayarqanmi.

31Tayta Dios mandaptinmi upukrukunapis y chuspikunapis entëru Egiptuman juntarqan.

32Tamyapa trokinmi runtu tamyata tamyatsimurqan.

Entëru tsay nacionmanmi maqakuyta pashtatsimurqan.

33Tsay runtu tamyam üvapa yurankunata y hïguspa yurankunatapis usharqan.

Egiptuchö llapan muntikunatam usharqan.

34Tayta Dios mandaptinmi imayka niraq chukllushkunapis tsayman juntayarqan.

Yupaytapis mana atipaypämi tsaytsika kayarqan.

35Llapan qewakunatam ushayarqan.

Chakrachö mikuykunatapis chipyaqmi ushayarqan.

36Egipto runakunapa llapan mayor tsurinkunatapis Tayta Diosmi wanutsirqan.

37Atska qoriyuqta y atska qellayyuqtam kuyanqan runakunata jipimurqan.

Yarqayämuptin manam ni pipis micharqantsu.

38Egipto runakuna pasaypa mantsakashqa kaykarmi aywakuyaptin kushikuyarqan.

39Israel runakunata llantupänanpämi pukutayta Tayta Dios alistaparqan.

Paqaspa aktsipänanpämi lunyaykaq ninata alistaparqan.

40Aytsata mañakuyaptinmi codornizkunata yuritsirqan.

Pacha junta mikuyänanpämi ciëlupita mikuytapis alistapämurqan.

41Upuyänanpämi yakutapis qaqapita pashtatsimurqan.

Tsaymi desiertupa atska yaku aywarqan.

42Tsaynömi sirviqnin Abrahamta awninqanta cumplir Israel runakunata Tayta Dios yanaparqan.

43Egiptupitam kuyanqan runakunata jipimurqan.

Jipimuptinmi pasaypa kushishqa yarqayämurqan.

44Paykunatam jäpa runakunapa markankunata Tayta Dios entregarqan.

Jäpa runakuna aruyanqantam imaykatapis paykunata entregarqan.

45Tsaynö entregarqan estatütunkunata y leyninkunata cäsuyänanpämi.

¡Aleluya!