Eclesiastés 5 - Bible in Quechua of South Conchucos（qxo）

Tayta Diosta awninqantsikta cumplinapä yätsinqan

1 1 (4.17) Tayta Diospa templunman aywar shumaq yarpachakunki tsaychö yachakunqaykita cäsunaykipä. Mana tantiyakuq runakunanöqa ama kankitsu. Paykunaqa sacrificiuta aparpis Tayta Diosta manam cäsuyantsu. Mana tantiyakurmi jutsata rurayan.

2 2 (1) Llutallaqa Tayta Diosta imatapis ama awninkitsu. Ni yarpaynikillachöpis mana cumplinaykipä kaqtaqa ama awninkitsu. Payqa ciëluchömi kaykan y qamqa kay patsachömi kaykanki. Tsaynö kaykaptinqa mejor upällakunki.

3 3 (2) Alläpa yarpachakuqkuna mana allitam sueñuyan.

Tsaynöllam alläpa parlaqkunapis manakaqkunata parlayan.

4 4 (3) Mana tantiyakuq runaqa llutalla awnirmi Tayta Diosta rabyanätsin. Tsaynö kaykaptinqa Tayta Diosta awninqaykita mana qonqaypa cumplinki.Deut. 23.21-23; Sal. 66.13-14.

5 5 (4) Mana cumplinaykipä kaptinqa ama imatapis awninkitsu.

6 6 (5) Cuidädutä Tayta Diosta imatapis llutalla awnirkur sacerdötipa puntanchö ninkiman: <>.

Tsaynö nir Tayta Diosta rabyanätsiptikiqa castigashunkim.

7 7 (6) Runaqa munanqanta chaskinanpä yarparmi alläpa parlar llutalla imatapis awnikun. Qamqa Tayta Diospita mantsapakur ama tsaynö kaytsu.

Mana alli autoridäkuna kayanqan

8 8 (7) Maytsaychöpis pobrikunata pasaypa ñakaykätsiqta rikar o mana alli autoridäkunata rikar ama mantsakaytsu. Autoridäkuna tsaynö llutanta rurayan mas poderyuq kaq autoridäkuna janan shäriptinmi. Y tsay poderyuq autoridäkunapapis mas mandaq autoridäkunam janan shäriyan.

9 9 (8) Tsay autoridäkuna mana allikunata ruraykäyaptinqa ¿nacionnintsik allitsakanqatsurä? Tsaynölla ¿chakra runakunata rey yanapaykantsurä?

Arur tarinqantsik ushakaqlla kanqan

10 10 (9) Qellaypä mallaqashqa kaqkunaqa tarirpis manam contentayantsu. Rïcu runakunaqa rïcuyarpis manam contentayantsu. Tsaynö kayanqanpis manakaqllapämi kaykan.

11 11 (10) Imaykantsikpis mas atska kaptinmi imaykachöpis mas ushantsik. Nisitanqantsikpita masta tsarararpis manam ima provëchutapis jipintsiktsu, sinöqa rikayllam rikaykuntsik.

12 12 (11) Arukuq runaqa wallkata o atskata mikurpis kushishqam punun. Peru rïcu runam sïqa imaykanpäpis yarpachakur ni punuytapis tarintsu.

13 13 (12) Kay patsachömi rikarqü rïcu runa imaykata qorinqanpis afanllanpä kanqanta. Tsayqa pasaypa llakikuypämi.

14 14 (13) Tsay runaqa mana alli negociuman mëtikurmi llapan imaykantapis ushaskin. Tsaymi tsurinta jaqipänanpä imanpis kannatsu.

15 15 (14) Kay patsaman jinaylla shamunqantsiknöllam jinaylla aywakushun. Aywakurqa manam imantsiktapis apashuntsu.Job 1.21; Sal. 49.17; 1Tim. 6.7.

16 16 (15) Tsaynö kaykaptinqa ¿imapätä välin pasaypa ñakar arunqantsikpis? Tsayqa llakikuypämi kaykan.

17 17 (16) Tsaynöllam kawanqantsikyaqqa llakikurnin pasaypa yarpachakur, nanatsikur y qallayashqa kawantsik.

18 18 (17) Tsaynö kaykaptinqa noqapa tantiyaynïpita mikushun, upushun y kay vïdachö ñakar tarinqantsikkunata kushishqa gastashun. Tsaynö kawanqantsikmi päguntsik kanqa.

19 19 (18) Tsaynö kaykaptinqa Tayta Dios alistapämanqantsikta mikur upur kushishqa kawashun. Tsaynö kushishqa kawanqantsikmi Tayta Diospa bendicionnin kaykan.

20 20 (19) Kushishqa kawanantsikpä Tayta Dios yanapamashqaqa manam yarpachakuntsiknatsu imayyaq kawanantsikpä kanqantapis.